احكيلنا عن عربية شــــديت معاها و طلعت منهااا او ماقدرتش تحصلها

[elosos2002]

موضوع اتمني من الجميع التفاعل معاة وياررررييييت بلاش فشرررر احنا بنحكي و منة نتعرف علي العربيات و امكانياتها من واقع التجربة و الطريق

احكي عن موقف حصل و شديت مع عربية وطلعت منها او لو مثلا ماقدرتش تحصلها او تساويتوا مع بعض و هكذا و ياريت ع الاقل نعرف نوع العربية اللي انت راكبها وامكانياتها ( المكنة كام سي سي ومانيوال ولا اوتوماتيك وفيها تعديلات ولا لا و الطريق اللي شديت معاة و نوع العربية اللي شديت معاها ..... وهكذا ويارب الموضوع فكرتة تعجبكوا و ماتكونش مكررة

انا هبدأ بنفسي انا معايا سيفيك vti المكنة 1600 والعربية اوتوماتيك مفيهاش اي زيادات لا ع المكنة و لا ع البادي

شديت مع ماذدا فاميلي موديل 98 او 97 الاتنين شبة بعض معرفش بصراحة مانيوال ولا عادة و كان علي طريق الاسماعيلية و طلعت منة بمسافة كبيرة اوي و صاحبها حصلني واحن في الزحمة بتاعة محطة تحصيل الرسوم و اعد يزغرلي كأني دوست علي عيل من عيالة مثلا:sleep:

وتاني عربية حسب منا فاكر كانت جولييت و دي مع احترامي لكل اللي راكبينها ماتنفعش تشد اساسا .
دة زميلي في المكتب واتراهنا وعربيتة مسقط لها مكنة نوبيرا و هيا اوتوماتيك وفيها شكمان ديفل و فلتر سياموتو وعتب و سبويلر و تحفة ماشء الله بس شكلا بس وليس اداء"
ورحنا و معانا زمايلنا و ماطلعتش منة لانة ماحصلنيش اساسا ولا شاف ضهر العربية من اصلة :17:

والتالتة كانت من كام يوم بي ام 316 موديل 98 مكنة 1800 سي سي اوتوماتيك والله العربية تحفة بس تقيلة و سحبها مش زي الهوندا خالص ان طلعت منة في القومة ( الطلعة ) وهديت كمان علشان نشد جمب بعض و شدينا وطلعت منة بمسافة :53:


دة الي حصل لغاية دلوقتي و مستني تفاعلكم مع الموضوع لو عجبكم
:jap::glasses:

[tmedhat]

انا معايا هوندا اس اى
1600 سىسى
جريت مع عربية بى ام دبليو لغاية 195 كيلو المراية على المراية
و بعدين هو كمل و فات منى
طانت 535 اى

[mody010]

موضوع لزيز على فكره

انا مره شديت بعربيه 128 مع عربيه واحد صاحبي بيجو 504 وصلت معاه لحد 120 احنا الاتنين جمب بعض بس هو عربيتيو مجابتش اكتر من كده و انا بالنسبالي معديتوش بس وصلنا سوا 120 جمب بعض مفرقش عني بس عربيتيو كانت عايزه طقم شنبر و انا عربيتي كانت مفوته :oh:

فى دبي انا شديت مع ليكزس 430 موديل 99 و انا بجولف جي تي اي 2400 سي سي موديل 1994 مش متسقط لها اي حاجه وصلت معاه من 90 لحد 160 مش من الثبات بس بعد كده مشفتوش :jap::jap:

مره تانيه كان معايا نفس الجولف على فكره هي اتوماتيك .. و كان جمبي تيوتاا ستارليت حاجه كده زي علبه الكبريت و الاشاره فتحت و مشفتوش :jap: مش عارف بصراحه اكيد متسقطلها حاجه لان العريبه دي غريبه اوي مش بيرضو يرخصوها هنا فى دبي بتترخص فى حتت تانيه فيها مضمارات سباق

اخر حاجه تزكر كان معايا سياره اخويا هوندا سيفك 2008 و كان في عربيه نيسان التيما 2500 سي سي و انا عربيه اخويا 1800في اشاره في حته اسمها عجمان .. طلعت منو فى الاشارع من الثبات مشافنيش

[EnG. Ho$$@M]

بجد موضوع فكرته روعة بس المكان ده مش مكانه

ممكن يتنقل للقسم العام

ولي عودات (( مش عودة واحدة ))

تحياتي لشخصكـ أخي

[eng-mahmoud2008]

حبيب قلبى :jap::jap::jap::jap::jap::jap: انت عملت اجمل موضوع والله لأن ده هوايتى المفضلة
انا بمشى فى اى طريق اشمشم على عربية تشد معايا و تكون موديل فوق ال 2005 ههههههههههههههههههههههههههههههههههههههههههههههههه

اولا انا معايا هوندا سيفك موديل 84 مكنتها 1500 سى سى بس عزمها جبار بالنسبة لموديلها ( 125 حصان ) ومش معدل فيها اى حاجة

ابدالك بقى بالعربيات القديمة وانت طالع ( اصلى شديت مع عربيات كتير جدا )
1- سيفك 79 وده لسة النهارده على الدائرى وكانت ملاكى اسماعيلية ( وده العربية اللى خلتنى استغرب جدا مع انها سيفك زيى بس فضل لازق اكصدامة فى اكصدامى لحد ال 170 وانا كنت هتجنن )
2- مرسيدس 200 موديل 84 وده بتاعت واحد صحبى وبشد معاه كل اسبوع مرتين او تلاتة( مكنش بيشوفنى قبل ما ادى العربية التانى )
3- مرسيدس 230 موديل 84 برده بس متعدلة انجيكشن برده بتاعت واحد صاحبى ( كان بيقاوم معايا شوية بس برده هيهات لمن تنادى مجرد ادوس على التانى مبشوفوش ورايا من اساسة )
4- بى ام دابليو موديل التسعينات كده كانت 316 وكنا ماشيين على 70 تقريبا وشديت قصاده ومقدرش يجبنى نهائى
5- الدايو بكل موديلاتة بما فيهم النوبيرا والليجانزا ( عربيات كلها على بعضها متساويش فرده كوتش من الهوندا )
6- الهيونداى بكل موديلتها بما فيها الإلنترا 2008 ( ومكنتش متخيل ان الإلنترا بالضعف ده )
نخش بقى على العربيات الشديده فعلا
7- بى ام دابلو 520 و 525 ودول عدونى بعد ال 160 ( بس كانو بيعيطوا وتفوا على العربيات اللى راكبنها )
8- مرسيدس C180 كمبروسير وده برده عدانى بعد ال 160
9- مرسيدس S320 وده اجمد عربية شديد معاها ( انا كنت بطلع منة واول ما اجيب ال 120 الاقى صاروخ جاى ورايا أقوم مزنق عليه لغايه ما لبستة حطة مطب وجريت هههههههههههههههههههههههه )

وطبعا فيه عربيات كتير جدا شديد معاها وطلعت منها
وفيه اللى معرفتش اعمل معاهم حاجة من اول طلعة زى السيفك موديل 92 بس كانت مكنتها 2 كامة 170 حصان VTEC
ولو مش مصدقين كلامى ده فيديو لعربيتى وانا بجيب من 0 ل 100 فى 10 ثوانى (http://www.4shared.com/file/43268171/dae02630/my_honda_civic_84.html)
وده اللى اى عربية من الموديلات العادية الموجوده فى مصر محققتهوش
على سبيل المثال
بى ام دابلو الفئة الأولى 10.6 ثانية
اوبل فيكترا 10.7 ثانية
اوكتافيا مانيوال 11 ثانية
اوكتافيا اوتوماتك 13 ثانية

[elosos2002]

eng-mahmoud 2008 انت نجم و عربيتك بسم الله ماشاء الله زي الفل ربنا يباركلك فيها و اية يا عم كمية العربيات اللي شديت معاها انت قاعدلهم ع الدائري ومستني اللي يقع ههههههههههههه
شكرا ع الرد الجامد يا جامد وربنا يا عم مايوقعناش في شدة معاك ههههههههههههه
مشكووووررررررررررر

[eng-mahmoud2008]

eng-mahmoud 2008 انت نجم و عربيتك بسم الله ماشاء الله زي الفل ربنا يباركلك فيها و اية يا عم كمية العربيات اللي شديت معاها انت قاعدلهم ع الدائري ومستني اللي يقع ههههههههههههه
شكرا ع الرد الجامد يا جامد وربنا يا عم مايوقعناش في شدة معاك ههههههههههههه
مشكووووررررررررررر

ههههههههههههههههههههههه
لأ بس انا بجد بتكيف قوى لما بشد مع حد وأبهدلة
وكل ما اكون على الطريق بشمشم على اى حد اشد معاه ( ويا مكترهم )

ورغم ان عربيتى المتواضعة فيه كتير افظع منها بس انا بعشقها لأسباب كتير
لما تكون عربية 1500 سى سى كاربيرتير عزمها 125 حصان وفى المقابل اقتصادية فى استهلاك البنزين ( 15 كيلو لكر لتر ) من 0ل 100 فى 10 ثوانى وده زمن اقل بكثير من العربيات اللى فى نفس فئتها

بزمتك مش اليابانيين دول عباقرة
مبيهتموش بالقوة زى الألمان والأمريكان
انما هو التميز
وانا متأكد ان اليابانيين وبالأخص شركة هوندا لو طلعت عربية ماسيلز هتكتسح

[xamn_323]

ههههههههههههههههههههههه
لأ بس انا بجد بتكيف قوى لما بشد مع حد وأبهدلة
وكل ما اكون على الطريق بشمشم على اى حد اشد معاه ( ويا مكترهم )

ورغم ان عربيتى المتواضعة فيه كتير افظع منها بس انا بعشقها لأسباب كتير
لما تكون عربية 1500 سى سى كاربيرتير عزمها 125 حصان وفى المقابل اقتصادية فى استهلاك البنزين ( 15 كيلو لكر لتر ) من 0ل 100 فى 10 ثوانى وده زمن اقل بكثير من العربيات اللى فى نفس فئتها

بزمتك مش اليابانيين دول عباقرة
مبيهتموش بالقوة زى الألمان والأمريكان
انما هو التميز
وانا متأكد ان اليابانيين وبالأخص شركة هوندا لو طلعت عربية ماسيلز هتكتسح

الكورولا 2003 1300 سيسي 92 حصان مع فرق السنين و التكنولوجيا
أنا اعتقد ان اليابانيين و خاصة شركة هوندا اخرجت من مواتير سيارتها القديمه و الحديثه عزم خرافي
و قيس علي كده بقي
يعني انا عربية والدي مازدا 323 موديل 92 1300 سي سي 75 حصان
وال1600 منها 92 حصان
وال1800 تيربو 210 حصان
الكلام ده من سنة 90-94 !!!!

صوره لها

http://upload.wikimedia.org/wikipedia/commons/thumb/0/04/90-92_Mazda_Protege.jpg/800px-90-92_Mazda_Protege.jpg

[elosos2002]

فعلا يا جماعة و الله يكفي نعومة المكن و صوتة اللي يكاد يكون مش مسموع الياباني متعة في السحب و الركوب و كل الياباني ممتاز و علي رأسهم هوندا حتي الخليجيين في منتدياتهم بيقولوا اللي ماركبش هوندا ماساقش عربية

[elosos2002]

اية يا رجالة هوة محدش بيشد غيرنا ولا اية 5 اعضاء بس في ال 298 واحد اللي قروا الموضوع هما اللي بيشدوا ؟؟؟

[xamn_323]

شديت بالمازدا النهارده مع 206 ضيعته اديت 3 ما بانش الواد ورايا (كان علي كوبري اكتوبر الساعه 7 و ربع)

[elosos2002]

اخي xamn_323 عربيتك ماذدا اية موديلها وامكانياتها و بعدين عاوزين نخلي بالنا من حاجة يا جماعة ان الشد بيكون الطرفين عارفين انهم بيشدوا فاهمني بمعني ان ممكن انا اشوف حد قدامي بيجري والله اعلم بيجري لية بس اللي باين انة بيجري فا انا اخد القرار من طرف واحد اني هاشد و اجري و يكون هوة مش في دماغة او بيجري اة بس اخرة مثلا بينة و بين نفسة 140 مايعديش او ماياخدش بالة اساسا ان فية حد بيشد معاة فا كدة مانبقاش لا شدينا و لا بتاع فا يارت نحكي علي اللي كان الطرفين فية بيشدوا مع بعض بعند اقصد ومشكور ع الرد

[eng-mahmoud2008]

انا رجعتلكم تانى النهارده بس المراده انما ايه ............ شديت مع تلات عربيات مرة واحده

امبارح على الطريق الزراعى مصر - اسكندرية الساعة 1.30 بالليل وكالعادة بمشى ادور على اى عربية اشد معاها
وانا بعمل حركة حلوة قوى فى العربية اللى عايز اشد معاها علشان اخلى اللى سايقها يتنرفز بقوم دايس جامد وراه ولما يكون بينى وبينة مفيش اقوم خاطف نفسى من وراه ومعدى من جنبة بسرعة وبيكون بين مرايتى ومرايتة مفيش سنتى مترات الحركة ده احنا بنسميها يشعره يعنى يخلى بينة وبين العربية اللى جنبة مسافة شعرة
ههههههههههههههههههههههههههه
الحركة ده وحشة جدا لأن مع فرق السرعة بينى وبين العربية اللى جنبى الهوا بيأثر على العربية اللى جنبى ويخلى الدريكسيون يلعب فى ايده بمعنى تانى عند سواقين المكروباص ( انا كده هزقتة ) ههههههههههههه ما علينا


المهم من اول قليوب بدأت معايا عربية اوكتافيا وبعد شوية انضمت لينا لانسر بومة وبعد شويه دخل معانا لانوس 2 وفضلو يجرو ورايا وانا عمال اخد غرز يمين وشمال وبهدلتهم وطبعا الطريق كان زحمة فعلشان كده كانت دايما السرعة ما بين 130 و 150 وكويس ان الطريق كان زحمة لأن بصراحة لو حد فيهم كان زود عن ال 150 مكنتش عرفت اعمل حاجة لأن من يوم ما غيرت البنزين وبقيت بستعمل ال 80 والعربية مبتزودش عن 150
فضلو ورايا لحد ما عدينا بنها ومشفتهم فى المرايا تانى


وده فيديو صورتة للعداد وانا بشد معاهم وانا جايب ال 150 (http://www.4shared.com/file/49771122/8a4b2b08/01062008.html)

معلش انا تلفونى على قدى فالتصوير مش قد كده

[elosos2002]

ان يا عم خلتني ماشي ادور علي اي سيفيك موديل 84 ع الدائري و لا ع الزراعي مش علشان اشد معاهاا لااا علشان ابعد عنهااااااااااااااااااا
ربنا يكرمك يا باشمهندس و يسلم طريقك و تبطل (تشعر) العربيات اللي جمبك لان ممكن بغلطة خلخلة هوا من اللي بتحصل الدركسيون يختل في ايدة فا يحصل مالايحمد عقباة ولا يكون فرفور من اللي بنشوفهم اهم حاجة عندة يجري و بس انما مايعرفش حاجة في فنيات السواقة و التحكم في العربية فاخلي بالك و ابعد عن الفئات العالية بلاش فضاااااااايح

[nasser_102]

السلام عليكم ورحمه الله وبركاته
انا احب اشارك معاكم بس بصراحه قلقان شويه لان عربيتى متواضعه انا معايا فيات 125موديل 81 1500سى سى طبعا منيوال
طبعا كل اللى هيبص على كلمه فيات 125 يقولك وهى دى عربيه بتشد اساسا بس على العموم والله العربيه بتعمل معايا شغل زائد انى بصطاد الناس اللى اشد معاهم فى الزحمه وحطو تحت الزحمه دى ميت خط لان طبعا امكانيات عربيتى متواضعه بس اللى بينفعنى ان اغلب الناس اللى قابلتهم لغايه دلوقتى محدش فيهم يعرف يظبط الاداء فى الزحمه وده من فضل ربنا عليا مع انهم بيبقو راكبين حاجات زيرو يعنى مثلا نوبيرا 2 لانوس لانسر يعنى ده اللى انا فاكره
معلش ياشباب انا نييت اقولكم انى عامل شويه تعديلات فى العربيه انا منزل موتور بلونيز موديل 95 عليها وكمان فتيس 5 سرعات بصراحه عاملين معايا شغل جامد وبستعمل بنزين 80
اطرف حاجه حصلت ليا انى مره اصطدت واحد كان معاه لانسر عيون صفيه على ما اظن وطبعا كان معاه عربيه موس بس سواقه صفر على الشمال المهم بدات اشد معاه طبعا فى الزحمه مكانش بيشوفنى بس اول ما الطريق يفضى بيبقى لازق فيا للعلم انا العربيه عندى بتشد برده زى باقى العربيات بس محتاجه تاخد وقتها على ما تفكر ده طبعا ازبل حاجه فى الفيات انها ما بتسحبش بسرعه زى اليابانى عامه المهم قعدت اشد انا وصاحبنا ده وجبت اخر حاجه العربيه عندى ممكن توصلها حوالى 130 بطلوع الروح والطريق فاضى ومره واحد هوووووووب الاقى نفسى بخبط فى قمع لجنه وانا بسحب فى ضهر اللانسر المهم طبعا الرادار كان عامل لنا فيلم هندى فى اللجنه دخل صاحبنا بتاع اللانسر والظابط اخد رخصه وسامعه بيقوله عديت 120كيلو غرامه 100 ههههههههههههههه انا طبعا نفس الكلام بيقولى انت عديت 100 و كان هيكمل بعد كده بص لشكل العربيه فسكت قالى عديت 100 وواحد هههههههههه بصيت له كده وضحكت قولت له حضرتك انت متاكد ان الرادار بتاعكو مش تايوانى انا مستعد ادفع الغرامه بس تدينى شهاده معتمده من المرور ان العربيه دى بتعدى 100 كيلو فى الساعه قعد يضحك قالى اقل حاجه 25 جنيه لازم تدفعها دفعتها وسبت صاحبنا قاعد يغنى ويقوله ازاى و100 جنيه ومش ميت جنيه بس بصراحه كل ما افتكر الموقف ده اقعد اضحك قلت اشارك بيه

[elosos2002]

هههههههههههههههه موقف مسخرة بصراحة يا ناصر معني كدة ان الرادار بياخد بشكل العربية و انت ماصدقت و انتهزت الفرصة و مستعد تدفع بس المرور يثبت انها بتجيب 100 ههههههههههههه مكنش حد غلب يا معلم
شكرا ع المشاركة الجميلة

[nasser_102]

هو مش الردار هو بس الظابط مكنش مقتنع ان العربيه القديمه دى مشيت بالسرعه دى وانا مصدقت لقيت شكله مش مقتنع واستغليت الفرصه اسواء استغلال اصل كمان فيه حاجه تانى نسيت اقول عليها انا صعيدى والموضوع ده حصل على طريق اسيوط الزراعى واحنا عندنا فى الصعيد الناس من طيبتهم سهل اوى انك تضحك عليهم حتى ظباط الشرطه بس مش كلهم:msn-wink: فيهم ناس مبيعدوش الهوا بس انا حظى وقع فى واحد من الجماعه الغلبانين

[elosos2002]

عقبال ما يقع في قرعتنا ضباط من دول يا ناصر يبقي تمام اوي

[xamn_323]

اخي xamn_323 عربيتك ماذدا اية موديلها وامكانياتها و بعدين عاوزين نخلي بالنا من حاجة يا جماعة ان الشد بيكون الطرفين عارفين انهم بيشدوا فاهمني بمعني ان ممكن انا اشوف حد قدامي بيجري والله اعلم بيجري لية بس اللي باين انة بيجري فا انا اخد القرار من طرف واحد اني هاشد و اجري و يكون هوة مش في دماغة او بيجري اة بس اخرة مثلا بينة و بين نفسة 140 مايعديش او ماياخدش بالة اساسا ان فية حد بيشد معاة فا كدة مانبقاش لا شدينا و لا بتاع فا يارت نحكي علي اللي كان الطرفين فية بيشدوا مع بعض بعند اقصد ومشكور ع الرد
العربيه مازدا 323 موديل 92 1300 سي سي بدون اي تعديل صورتها في مشاركتي اللي فاتت
البيجو الللي انا شديت معاها كان بيشد معايا فعلا مش بيجري و خلاص
القرار كان من الطرفين:2:
شكرا

[elosos2002]

مشكور اخي xamn_323 علي التوضيح و ربنا يباركلك في العربية

[a.falcon]

على فكره انا معابا عربيه fiat dino 1973 1600cc 135HP
والله ما كل معايا لا هوندا ولا غيرها على الدائرى او غيره
واتسحبت منى الرخصه على 165 كم/الساعه على الدائرى كنت فاتح مع mazda 3 1600cc بس حقن وانا عاده ههههههه طبعا وخيطه فى كل الغيرارت
وانا والله بعشق الراجات خصوصا الى بيستقل موديل السياره وهى تحفه الشكل كوبيه ولونها احمر نارى جايه من ايطاليا مش من مصر والصوره ايه
http://http://bringatrailer.com/wp-content/uploads/2007/12/1967_Fiat_Dino_Hardtop_Coupe_Front_1.jpg
http://http://bringatrailer.com/wp-content/uploads/2007/12/1967_Fiat_Dino_Hardtop_Coupe_Front_1.jpg هى دى الى معايا ولاكن ديه الصور من النت علاشان نقاء الصور
وعلى فكره مفشي غيره فى مصر ولا ايه؟؟؟؟
انا مشفتش غريها خالص مع انا قطع عيرها هى هى 132 fiat

[a.falcon]

http://bringatrailer.com/wp-content/uploads/2007/12/1967_Fiat_Dino_Hardtop_Coupe_Front_1.jpg

fiat dino 1973

[a.falcon]

http://farm2.static.flickr.com/1099/1303261776_db992d67b2_o.jpg
fiat dino 1969

[eng-mahmoud2008]

على فكره انا معابا عربيه fiat dino 1973 1600cc 135HP
والله ما كل معايا لا هوندا ولا غيرها على الدائرى او غيره
واتسحبت منى الرخصه على 165 كم/الساعه على الدائرى كنت فاتح مع mazda 3 1600cc بس حقن وانا عاده ههههههه طبعا وخيطه فى كل الغيرارت
وانا والله بعشق الراجات خصوصا الى بيستقل موديل السياره وهى تحفه الشكل كوبيه ولونها احمر نارى جايه من ايطاليا مش من مصر والصوره ايه
http://http://bringatrailer.com/wp-content/uploads/2007/12/1967_Fiat_Dino_Hardtop_Coupe_Front_1.jpg
http://http://bringatrailer.com/wp-content/uploads/2007/12/1967_Fiat_Dino_Hardtop_Coupe_Front_1.jpg هى دى الى معايا ولاكن ديه الصور من النت علاشان نقاء الصور
وعلى فكره مفشي غيره فى مصر ولا ايه؟؟؟؟
انا مشفتش غريها خالص مع انا قطع عيرها هى هى 132 fiat



بصراحة اول مرة اسمع عن العربية ده وعمرى ما شفتها
بس انا بحترم قوى العربيات القديمة ولما بتكون جامده
مش عارف بحس ان كل الجديد فيه كماليات كتير بس تقيل فى المشى قوى
وياريت لو نتعرف بيك ممكن اقدر اشد معاك
:glasses::glasses::glasses::glasses::glasses::glas ses:

[elosos2002]

مشكور اخي a.falconu ع المشاركة وفعلا انا اول مرة اشوف العربية دي ربنا يباركلك فيها يارب بس ما تقنعنيش انها تطلع من الجديد انا الهوندا عندي 140 هورس باور بس الموضوع بيبقي سحب و ثبات و كمان ماتنساش عمر المكنة الافتراضي و انت بتقول انها موديل من السبعينات و كمان قطع غيارها هيا ال 132 و الا 132 اساسا فاشلة فا حاجة موديل من السبعينات و احنا انهاردة في 2008 يعني بقالها 40 سنة ماشية ماتقنعنيش انها تعدي اللي بقالة 5 او 6 او حتي 10 سنين شغال معني كدة انها بقي لما كانت زيرو ماكانتش بتمشي ع الارض مادامت بعد اربعين سنة بتعمل كدة في الجديد ؟؟ دة رأيي وماتزعلش من كلامي و فهمني لو انا فية حاجة غامضة مش فاهمها وخصوصا ان المكنة عندك زي مانت قلت 1600 سي سي و الهورس بور 135!!! وموديل 1973 بيني و بينك كنت انا لسة ماتولدتش ولا الحاج هوندا نفسة كان بدأ يعمل سكوتر

[a.falcon]

انت معاك حق 100% 100 يا elosos2002
بس دى الحقيقه
والله انا مش بكدب
ولاكن العربيه فعلا اترفعت لاكترمن 20 سنه
هى جت مصر وانا لسه متولدتش وانا كبير ابويه وعندى الان 22 عام وانا متطاع العربيه من 2001
والمتور هو 2 كامه كربرتير من مركه ويبر الشهيره 2باب تعنى بيفتخ الاتنين مع بعض بعكس فى كتير يفتخ واحد والتانى فى السرعه
وده من اسباب اختفاظى الشديد بل العربيه .
وشكرا على المشركه الجميله ديه قوى قوى
ومضوع جامد وجديدموووووووووووت
ثم الطالينه جمديدن بأماره الفرارى والامبورجبنى


ثم انت عندك الموستنج 1967 دى جمده اخر حاجه ومن العربيات السريعه جدا بلرغم من ان الموتور كبير وأنا عارف بس موديل 67http://www.agtom.eu/allegro/1mustanggreen.JPG
Mustang 1967 GTI

[a.falcon]

ثم مع احترامى مين الى بيعيب فى اجمد عربيات فى العالم
(bmw_mercedes)
مع احترامى الهواندا بردك ليها حق بس الكبير كبير
المعروف انا افضل مواتير فى العالم من نصيب شركه بى ام دابليو(السرعه العاليه مع اقل الحتكاك الداخلى المؤادى للحراره العاليه) ثم الالمانى لا يعلى عليه.

[eng-mahmoud2008]

ثم مع احترامى مين الى بيعيب فى اجمد عربيات فى العالم
(bmw_mercedes)
مع احترامى الهواندا بردك ليها حق بس الكبير كبير
المعروف انا افضل مواتير فى العالم من نصيب شركه بى ام دابليو(السرعه العاليه مع اقل الحتكاك الداخلى المؤادى للحراره العاليه) ثم الالمانى لا يعلى عليه.

مش شرط ان العربية تكون سريعة ان يكون سحبها عالى

فيه حاجة اسمها نسبة تعشيق
وده اللى بتدى العربية سرعة عالية وكل ما سرعة العربية تذيد كل ما عزمها بيقل وهنا مربط الفرس


لو عندك عربية من هوندا عزمها 200 حصان مثلا هتلاقى سرعتها لا تتعدى ال 240 كيلوا فى الساعة
ولو عندك عربية بى ام دابليو مثلا برده عزمها 200 حصان هتلاقى سرعتها تتعدى ال 280 كيلوا فى الساعة
وده اللى بيخلى سحبها اقل من الهوندا علشان نسبة التعشيق للغيارات بتاعتها اعلى منها فى الهوندا فلذلك بتلاقى سحبها اقل من الهوندا

وشركة هوندا بتركز على الأداء مع اقتصادية رهيبة
يعنى انت لو جبت عربية المانى بنفس اداء عربية هوندا هتلاقى استهلاكها فى كل شىء ضعف الهوندا

وفى الأول وفى الأخر ده مسألة اختلاف اراء
والطريق هو اللى بيثبت

[amrgamea]

يا جماعه الموضوع ده معمول علشان الناس تقول هي طلعت من عربيه ايه مش تهزء في عربيات الناس و تقول دي متجيش فرده من عربيتي. طيب منا ممكن برضه أقول نفس الكلام و أضايق حد عنده العربيه إلي أنا غلطت فيها, يبقى ايه لزمته بقى؟

ملوش لزوم الكلام ده......

كل واحد يقول هو طلع من عربيه ايه و خلاص....

و نصيحه إلي يقول أنا طلعت من عربيه يبقى عارف ان الناس عارفه إمكانيات عربيته و العربيه إلي طلع منها.....

بجد يا جماعه لا داعي للمنظره لإن الشخص بيطلع في الآخر شكله وحش. و كلامي مش موجه لحد.... دي مجرد نصيحه.

[elosos2002]

شكرا ع المعلومات القيمة يا اخواني و ربنا يباركلنا كلنا في عربياتنا يارب و يعطينا خيرها و يكفينا و المسلمين شرها يارب و ياريت نرجع للموضوع الاصلي زي ماقال اخونا amrgamea وشكراا ع التفاعل

[calimera]

بصراحة موضوع جامد جدا ..

بس انا الحمد لله مشدتش مع عربيات كتير , لأني مش من هواة الموضوع ده , بس انا مهتم جدا بالسرعه والغرز وفنيات السواقة ..

انا معايا عربية ريتمو خليجي .. 1500 سي سي اوتوماتيك , دي مواصفاتها الاصلية , يعني انا مش معدلها اي حاجه

واعلى سرعة وصلتلها في لحد اللحظة دي 145 كيلو متر في الساعة .. بدون فشر او مبالغة

وشديت مع كذا عربية بيها , بس بحب احفظ كرامتي ومحاولش اني اشد غير مع عربيات من مستوايا , ده بالنسبة للطرق المفتوحة , لكن لو الطريق زحمة وبيعتمد على الغرز وتقدير المسافات , الحمد لله انا بقدر احتفظ بالصدارة

ومرة واحدة الشيطان لعب في دماغي وقالي اني اشد مع اخويا , وهو معاه عربية بيجو 605 بريستيج , 3600 سي سي .. موديل 2004

وكان على طريق مصر الاسماعيلية , والحمد لله السباق بقى عامل زي افلام الكارتون .. بقى يعدي مني وبعدين الاقيه هدى السرعة لدرجة بحس انه بياخد مطب .. واعدية ويسيبني فترة , وبعديه الاقيه سحب وجابني تاني ..

وبصراحة بعد ما ركبت عربيته فعلا حسيت بالفرق .. ودي هيا كل خبرتي في الموضوع ده , بس في الطرق الزحمة او العربيات اللي في مستوايا الحمد لله انا جاهز ومستعد لاي مواجهه , والحمد لله انا علشان اوصل للخبرة دي , خيّشت مرتين مرة فيهم كانت في صندوق زبالة حديد .. :whistle:

عموما , انا قلت ادخل اسجل اعجابي بالموضوع ده , واقول انه فعلا مبتكر وجديد من نوعه

[madomohsen]

واحد صاحبي طلب نشد مع بعض انا سكودا 1997 1300 سي سي مانيول و لا اي تعديلات و فيرنا 2007 1500 سي سي باور علي طريق التجمع الخامس المحور الموصل بين مدينه نصر و التجمع الخامس هو كسبني طبعا في الاخر بس انا كنت مسابقوا لحد ما طلعت عربيه نقل اظاهر كان موصيها عليا و فضلت تزنق عليا و كسب في الاخر

[elosos2002]

مشكورين اخواني calimera و madomohsen علي الرد و التواصل

[youssef_falcon]

السلام عليكم . الاول احب اشكركم على الموضوع الجامد . انا مرة شديت بعربية ابوية Opel Vectra موديل 2001 مع Bmw M3 Caprulet على طريق مصر اسكندرية الصحراوي . و طبعا معروف مين اللى كسب السباق:15::whistle:

[elosos2002]

طبعا يا يوسف معروف الاوبل طبعا لووووووووول

[Rehan Aveo]

الأوبل طبعا اللي كسبت ,,, امال هتكون البي ام يعني

[zalamoka0ne]

طبعا كل اللى هيشوف كلمة بولونيز هايقول دى عربية اى كلام وملهاش فى الجرى بس انا هاقوله لو الموتور والعفشة والكاوتش عندك حلوين ومش محتاجين مصاريف يبقى ممكن تجيب بيها 150 والعداد بتاعها 180 لأن اخر سرعة جبتها بيها كانت 150 على طريق مصر اسكندرية الصحراوى وكنت مع جولف 2 بس مش عارف عنها اى حاجة تانية وبالنسبة لعربيتى هى موديل 1987 ومافيش اى اضافات 1500 سى سى والحمد لله قدرت اعديها بمسافة كويسة اما تانى مرة كانت ابيزا سيستم بورش واللى عارف شكلها هايقول دى عربيى اى كلام زى ما انا قولت عليها بس هى اللى عدتنى مع انها صغيرة وانا قولت دى لو جابت 120 ممكن تتقلب لاقيتها عدت ال150 وانا كنت ماشى وراه عاوز اقوله انا منسحب بس هو طبعا مش استنانى الواد ما صدق انه يجرى شوية

[amor_beeh]

ههههههههههههههههه متفكرنيش ونبي بالشد انا معايا مازدا 323 موديل 82 مسقطلها مكنة 85 اول مرة فحياتي اشد مع حد كان على كوبري اكتوبر شديت مع ميكروباص للأسف D: فضلنا مع بعض لحد 120 وبعد كدا هو اخد غرزة بالميكروباص ونا لبست سواق الفيسبا 10 غرز هههههههههههههه هو خد الغرزة من هنا ونا لبست في الفيسبا وكان عليا اتنين لقتهم طايرين فالجو ههههههههههههههههههههههه من ساعتها بطلت شد عشان متنفخش تاني ههههههههههههه

[karimmomo911]

بص احكيلكم علي حاجة واللي عايز يصدق يصدق
عندي فيات 132 بس 1800 سي سي كنت راكب مع اخويا وناس اصحابه وهو اللي كان سايق وكنا علي طريق الفيوم فواحد صاحبه قاله العربية دي تعبانة وعلي قدها اوي فاخويا اتضايق فراح مريح رجله علي الدواسه لغاية 170 بعد كده هدي بعد كده لقيت مرسيدس 230 تقريبا موديل 85 عدي من جنبنا وكان فيه بنت وولد قاعدين ورا ولقيتهم بيعملولنا باي باي فانا قلت لاخويا انت تعرفهم قاللي لا والله فقلت اسخنه شوية تخيلوا ايه اللي حصل........

اقسم بالله العظيم طالعين منه علي 200 الراجل واحنا معدين من جنبه مكانش مصدق ان 132 تعدي المرسيدس ولمعلومة معرفش يجبنا اللي عند البوابات

[amrgamea]

نظرا لإن الموضوع أصبح يشجع بشكل عفوي و غير مقصود بالطبع من العضو القدير صاحب الموضوع على سرد قصص غير واقعيه بالمره و لا تفيد الأعضاء بشىء بل و قد تشجع على أفعال مخالفه للقانون و التباري بمخالفه القانون فسيتم غلق الموضوع و حذفه و يحذر على أي عضو عمل موضوع مماثل فيما بعد. و شكرا.

تقبلوا مني كل إحترام.