صباحك زي وشك يا مـ،ـصـ،ـر ( افضل ما قرأت )

[lyonaids]

صباحك زي وشك يا مصر..جميل وحزين



بقلم بلال فضل








صباح الخير يا مصر ..





http://photos1.hi5.com/0015/630/539/MrfNda630539-02.jpg







صباح الخير على الناس المرهقين من عناء الحياة والدايرين في الساقية اللي منصوبة لهم من سبع الاف سنة .. الناس اللي عايشة اليوم بيومه .
.كل أملها يعدي من غير اي خساير .. مابتفكرش في بكره عشان ماتتقهرش... مابتفكرش في النهارده علشان ماتتنقطش ..
صباح الخير على ضحكة عالية في قهوة شايها مايتشربش ..
على شاب بيقوم لست كبيرة في الاتوبيس.. على كوباية شاي باللبن وحتة بقسماط بعد صلاة الفجر جنب السيدة نفيسة ..
على قهوة في الحسين مبيعديش عليها حسن بشندي .. على سينما زحمة والضحك طالع من القلب للركب .. على سور الأزبكية وكتبه المعتقة ..
على عشاق فقرا مش لاقيين شقة فبيخطفوا الفرحة متداريين في صخور الكورنيش ورا شجر النيل ..
على صوت الشيخ السيد متولي وهو بيقرا سورة يوسف وبيخلينا نعيط على سيدنا يعقوب اللي ابيضت عيناه من الحزن ..




على عربيات الكبده والسجق لحمة الفقير وعربيات الدوم تفاح الفقير وعربيات السوبيا خمرة الفقير.. على طباق الكشري خالي العدس ورد زياده وغرقان في الدقة .
. على فطاطري الحسين اللي سمى نفسه بيتزا الحسين فباظ من ساعتها.. على العدوي بتاع ميدان الجيش يعني احلى رصة فول وطعمية بمستلزماتها وبرخص التراب ..
على أفران العيش في اسكندرية .. على البلكونات اللي مافيهاش كراكيب ولا بصل ولا توم .. فيها كرسيين وكوبايتين شاي وبصة رضا واهة شوق ..
على كل صالة بتلم الناس اللي مش عارفة تتلم على نفسها .. على كل نكته قبيحة تتقال بصوت عالي .
. صباح الخير على الطاهرة رئيسة الديوان ودراويشها وسجاد جامعها .

. على روح سيدنا الحسين اللي مش مدفون هنا اساسا ..
صباح الخير على كل سطر كتبه نجيب محفوظ وكل شجرة سقاها علاء الديب وكل فيلم كان هيعمله احمد زكي وكل كرسي ماتضايقش لما صلاح جاهين قعد عليه ..
صباح الخير على الناس اللي واقفة في طابور حكومة رخم بتتخانق عشان تسلي بعضها .. على مدرجات الدرجه التالتة وناسها اللي مش هنا اساسا ..
على الاهلي لما يسكع الزمالك ستة وساعات اربعة وساعات اتنين .. صباح الخير على كل ايدين بتسلم عليك باهتمام بعد الصلاة..
وعلى كل امام ما بيطولش في الوقوف ويطول في السجود ..


صباح الخير على سينمات الدرجه التالتة والفاكهة اللي مش مرشوشة مبيدات وسعاد حسني وهي بتغني انا ضاع مني حاجه كبيرة اكبر من اني اجيب لها سيرة ..
صباح الخير بالليل على فرشات جرايد الطبعة الاولى وحفلات الميدنايت والقهاوي المناوبة ..... على العيال وهي بتهز اكياس الكشري الصبح وهي رايحة المدرسة ...
. على بتوع الزلابية اللي واقفين قدام المدارس خايفين من البلدية ...
صباح الخير على اكشاك السمك في ابو قير والترام الاصفر وسيدي البوصيري وبردته والمراجيح اللي ورا ضريحه ..
وعم نفنف بتاع الكبدة في المنشية وطعمية ابو احمد الاكتع في شارع عمر بن الخطاب ..
صباح الخير على وقفة النواصي والقمم والخناقات " البوق " اللي الناس بتفش فيها غلها وبتوفر مادة فرجه للواقفات في البلكونات ..




. صباح الخير على كل جميلة تغري باثم النظرة الثانية والتاسعة .. صباح الخير على الناس اللي بتكوي قمصانها وتبص على المراية قبل ماتنزل ..
على شوارع الزمالك وجاردن سيتي والمعادي اللي تشرف وتفتح النفس للحياة
وعلى كل اللي بيمشوا فيها وبيفرحوا للي ساكنين فيها ....
صباح الخير على حب الجامعة ومظاهرات الجامعة وكل افيه اتقال على اي معيد غتت في اي سكشن ...
صباح الخير على الاوض اللي فوق السطوح والشقق المفروشة والايجار اللي مابيتكسرش ..
على صينية الاكل اللي بتيجي لك من الجيران قبل ما يتفقوا معاك تدي ابنهم درس...
على قران الفجر وصوت النقشبندي وهو بيقول مولاي اني ببابك قد بسطت يدي ...
صباح الخير على الجمعيات اللي ساتره الشعب المصري .. على تمييلة الصاحب على صاحبه في ساعة الزنقة ..



صباح الخير على ام حمدي عبد الرحيم اللي بتحب جمال عبد الناصر وام ايمن عبد الهادي اللي بتعمل رز مسكر وملوخية تضيع مستقبلك ,
وام على رجب اللي ماشفتش البحر الا في عربية الاسعاف اللي خدتها على المستشفى ...صباح الخير على كل نجع وكفر مايكفرش من العيشة ..
صباح الخير على الكنايس اللي شكلها حلو ,, على الاتوبيس النهري لما يكون نضيف.. على عم فاروق ونصبة الشاي بتاعة كوبري عباس ..
على كل زوجه مابتنكدش على جوزها , وكل راجل مابيستقواش على ولية وعلى كل ندهة لبابا وكل لعبة لبنوته ومسدس ميه لحماده ..
. صباح الخير على كراتين الجهاز المتعانة فوق الدواليب .. واحلام الجواز المتحاشة تحت البطاطين ..


صباح الخير على عامود السواري والفاتحة اللي بقراها وانا ببص من تحته على تربة ستي اللي قالتلي
وانا رايح الجامعة اول مرة " يابني البلد بلدهم يعملوا فيها ما بدالهم !"
صباح الخير على لمة صحابي في القهوة وشتايمهم فيها علشان بطلت اجي ..
صباح الخير على دعوة ربنا يكفيك شر طريقك ..

صباح الخير على عبد الناصر قبل مايبقى فرعون
وعلى الشعراوي وهو بيقول اذا كنت قدرنا فليعنا الله عليك , وعلى عبد الحليم وهو بيعيد كوبليه حبيبي والله لسه حبيبي والله ,

وعلى أم كلثوم وهي بتقول تهون عليا الروح لو فارقت جنبي , وعلى محمد فوزي وهو بيقول اي حاجه يعوزها ..
صباح الخير على مرجلة ابراهيم عيسى الذي اخرجني من الظلمات الى النور.

. على مسلسل ارابيسك وفيلم حب في الزنزانة وفينالة الكيت كات ونجيب الريحاني وهو بيغني
حتى الفيران اشتكت من قلة فرافيتي ... !

على عم حجازي اللي سابهالنا مخضرة وراح طنطا .. على محمود عوض اللي قاعد في البيت ....
على بهاء طاهر اللي بيصلب طوله علشان يروح المظاهرة ...
على فاروق عبد القادر وصحبته ..
على حمدي عبد الرحيم واكرم القصاص وقهوة المنظر الجميل
والايام اللي كنا مش لاقيين ناكل فيها بس كان عندنا شاي وسكر كتير..
صباح الخير على مراتي بنت الاصول اللي مابتخافش من اي حاجه بكتبها .
.صباح الخير على بنتي اللي لو ماشفتهاش بتكبر .. قولولها ان ابوكي كان راجل جدع .











...

[hardvolvo]

صبااااااااااااح الفل يا عم بلال
و صباح الياسمين يا ليو
بس أنا لسه مانمتش هخش أنام وأرجعلك تاني

[lyonaids]

ههههههههههه صباح الورد يا محمد معلش بقي عالريق كدا المقال ده
بس بصراحة هو عندي بقاله سنه وكل حبة افتحه اقري فيه

قلت ميغلاش عليكو حبيب قلبي
لازم تكتئبو حبتين زي ما بكتئب :lol:ههههههه




ربنا يوفقك في الامتحانات ..،

[el rayk gedan]

لازم تكتئبو حبتين زي ما بكتئب :lol:ههههههه



ماشى ياليو..وصل الاكتئاب ياحبيبى..،

[waleed mohamad]

انا كونت حاسس انو بلال فضل الي كتب الكلام ده
فعلا رائع

[moustatfa]

و الله العظيم موضوع جامد جداا يا ليو مقدرتش اقراة و ماردش فية

[Story Man]

صباحووووووووووووووووووووووووووووااااااا
زيى الفل والياسمين
ونسيت صباح اللى بتغنى
ههههههههههههههههههههههههه
وبعدين ليو ا
احلى حاجة صباح ربنا يكفيك شر الطريق دى ههههههه
فكرتنى بالموضوع
فكرة و نسيتة
تسلم على احلى صباااااااااااااااااااااااااح
تحياتى لك
فى رعاية الله

[King Of Sad]

والله من اروع ما قرأت فى حياتى بجد فناااااااااااااااااااااااااااااااااااااااااااااااا اااااان وصباح الفل يا بلد

[an an]

السلام عليكم
بلال فضل دايما معروف انه ساخر ومقالاته كده بتكئب بس بشكل غير مباشر
ياللا بقي صباح الخير عليكو

[MaX-love]

صباح العسل والفل والبقسماط و الكنافه و كل ما تشتهيه الأنفس وتلذه الألسن
هو الموضوع بيتكلم عن ايه ............:glasses:
موضوع جميل يا كبير
بس مش هنخلص من اللى بيحصل معانا فى البلد دى

[MR.MiDO™]

موضوع جامد موت الف شكر يا باشا

[إنًسَانِ]

الله عليك يا ليو وعلى بلال فضل بجد مقال رائع

بلال فضل الكاتب المفضل عندي هو والعبقري ابراهيم عيسي انا بقراء له من

وقت ماكان بيكتب فى صحيفة الدستور فى أواخر التسعينات قبل ماتقفلها

الحكومة فترة،،،شدني الأسلوب المتمرد الي بيتمتع به وتعبيراته الي صاغها بنفسه وسار على دربه

كثيرون لكن بصراحة مش بنص مهارته،،،بصراحة مقالة صباحك زي وشك يا مـصر
حبيتها وأعجبت فيها بعبقريته ويمكن هو المقال الوحيد فى العالم العربي الي تقرأه

وأنت بتشم أجواء وريحة البلد وحواريها وبتسمع صوتها الحزين وبتسمع

صـوت خطواتك وأنت بتلهث خلف بلال فضل وهو يرافقك فى القاهرة برؤيته

، بلال فضل ده مشكلة صعب أنه يحتوى عبقريته في أى مقال مهما كان ضخم

الكلمات عنده فيها توريه رشيقة تحتاج فطنة منك عشان تقرأ مابين السطور الغريب ان بعد ما أتفقت معه

أوربت عشان يشترك في تقديم فقرة الصحافة

مرتين في الاسبوع إختفى بلال فضل ولم يظهر الا مرتين لكن بعد كدة في جهات

عليا طلبت أو أمرت إدارة القناة بعدم مشاركته في البرنامج

وكأن بلال هو الي هيفجر الثورة الشعبية ببر المحروسة ،،،؟

معقولة يخاف النظام من خروج كاتب على الشاشة لمجرد أنه من الكتاب
الصحفيين المعارضين لنظام الحكم ،،، ؟

هو نظامنا المصري بكل ضعفه وخوفه ،،،؟

مش هو ده العهد الذي لم يقصف فيه قلم ولم تصادر فية صحيفة ،،، ؟

هنقول ايه ولا ايه عن القلم الكارثة بلال فضل الذى لا ينافسه لدي غير ثلاثة إبراهيم عيسى و لـيو وعمار الشريعى

[lyonaids]

ازيك يا خالد


شكرا علي مرورك ..
دخلت ارد عليك عشان اقولك واحشني

وحشتوني كلكو والله



هنقول ايه ولا ايه عن القلم الكارثة بلال فضل الذى لا ينافسه لدي غير ثلاثة إبراهيم عيسى و لـيو وعمار الشريعى

................يالهوي !!!......:detective2:

[lyonaids]

بشكر الجميع علي مرورهم


أحمد وأحمد ووليد ومحمد ومصطفي وميدو و an an



أسف عالتأخير في الرد والله ظروف ,


ونورتوني :jap:








.

[ThunderHeart]

موضوع جميل ، شكرا ليك

[yasser_x]

يا ســـلام عليك يا ليــو يا شديد

مقالة حلوة بجد لبلو , وبجد صباحك ومسائك زي وشك يا مصر

انا دخلت اسلم عليك بس يا ليو , شكرا لك ..

[Wanna Help]

فينك يا اللي في بالي تيجي تقول بقين حلوين كدا عن......ح؟؟؟؟؟؟م.....ص....ر....

صباح القشطة يا ريس

[M!ĐǾNH0]

مقال جميل ياصالح بيه
شكرا ليك

[mooneye2]

والأخ بلال مش نسى يصبح على أفلامه العبقرية العظيمة زى حاحا وتفاحة وعودة الندلة ؟؟.
..ولا دى مش من مصر برضه
..بكره اللى يعيش دور مش دوره
..وده اللى بيعمله بلال فضل بصراحة عامل فيها محامى الشعب الغلبان وهو ولا حاسس بأى حاجة ..

معلش ده راجل شغلته الكلام يعنى مش هتبقى صعبة انه يلاقى كلمتين حلوين يضحك بيهم علينا

[mtm567]

مش حاقول أكتر من كلمه واحده بس وهى : ممتازه

[senior_eg]

موضوع رائع يا لايو
بجد انت في اي قسم واي موضوع بتبقي رائع

[zizo_danger]

صباح الجمال يا مان

[MaX-love]

صباااااااااااح البتاع اللى من غير ريحه مع العلم بإننا بالليل بس كله زى بعضه
مش فى مصر بقى :glasses:

[kalapala]

انا بقا هاقولك غيرهم كلهم
صباح فخري
هههههههههههههههه
والله انت راجل عسل
وبلاال فضل ده راجل مزيكا
والشعب بقا ....
ولا بلااش

[MaX-love]

والله انت اللى زى العسل
بس هى مين صباح فخرى دى :glasses:

[girooo]

بجد بجد بجد بجد
تحفه تحفه وفعلا افضل ما قرأت فى حياتى بس اكيد بعد القران الكريم
تسلم ايديك بجد
سلام ليا وليك ولكل الناس اللى متبهدله :41::41::41:

[true friend]

طب صباح النور عليك وعلى كل الى شاركوا
والف شكر على الموضوع وهكذا هو الساخر بلال فضل
يوصلك راية وتصورة باسلوب ولا اجمل وانا شايف انة من افضل الكتاب والصحفين دلوقتى لانة بيعرف ازاى يوصل للقارئ

[mody_ok]

بدون تعليق