الاجراءات القانونيه المطلوبه لانشاء مشوع نت كافيه

[semsm]

-
-

-
-
-
عليك اولا أن تفتح ملف ضريبى بنوع النشاط الذى تريده وبعد استخراج البطاقة عليك عمل السجل التجارى وبعد ذلك تتقدم بطلب الى وزارة الثقافة قطاع شئون التراخيص الإدارة العامة للتراخيص الفنية لاستخراج ترخيص طبقا لنص المادة 7 من القانون 38 لسنه 1992 . ومعك عدد اثنين صورة شخصية وصورة عقد الإيجار وصورة البطاقة الضريبية وصورة السجل التجارى وصورة البطاقة وصحيفة الحالة الجنائية أصول تلك الأوراق للإطلاع عليها

[weswes1000]

مكشور اخى العزيز على الاجراءات

[yalaa13]

بس انا سمعت ان لازم ناخد تصريح من مديرية الامن صحيح الكلام ده سم المصنفات الفنيه

[yalaa13]

وتعرف فين عنوان الهيئه ده فى اسكندريه

[misho5210]

بعد ما بتروح المصنفات فى مصر بيبعتوك على مدرية امن القاهرة لاستكمال الورق وبعد ذلك يرسلو اليك بالبريد على عنوان النشاط بان تذهب لفرع امن الدولة التلبع لية لاستكمال باقى الورق و استلام التصريح وبعدين جواب المصنغات كافى الى ان يرسل اليك لاستلام الترخيص

[m_elmogy]

الله ينور يا أستاذ/ ميشو وخليك معانا بإستشاراتك وواضح إنك أستاذ كبير وفاهم كويس أوي

[yalaa13]

طب ممكن الرخصه تطلع باسم قاصر بولاية والده

[misho5210]

للاسف لا يجوز ولكن هناك حل وهو ان يعقد عقد شركة توصية بسيطة بين القاصر والدة وعندما يبلغ القاصر سن الرشد يدخل اسمة فى الترخيص لانة لايجوز استخراج الترخيص الا للشركاء المتضامنين ولو عايز صيغة عقد توصية بصيطه عندى

[alfastar]

و فيه حل تاني : افتح نشاطك من غير ولا ترخيص ولا غيره

[m_elmogy]

مفيش داعي للردود القاسية يا أستاذ alfastar وطبعا يجوز فتح نشاط للقاصر بولاية والده ...

[alfastar]

ردودي مش قاسيه ولا حاجه احنا في مصر بنواجه استفزازت من الحكومه كلها مش من جهه واحده والجدع هو اللي يخلص حقه و انت عارف كده كويس
لازم يكون فيه مواجهه

[m_elmogy]

أولا ، أشكرك على ردك وإهتمامك ..

طبعا أنا معاك والاستفزازات موجودة والفساد مستشري ... لكن الراجل بيسأل على الحل القانوني إيه ؟ وأعتقد إن ده هو دورك الحقيقي الذي إن لم تمارسه أصبحت شريكا في حلقة الفساد والاستفزاز ...
وإن كنت أرى أنك زميل فاضل ومن أكثر الناس تقديما ليد العون والمساعدة لباقي الأعضاء داخل القسم ..
و أرجو أن تستمر مسيرة العطاء إلى الأبد ..

والله الموفق ...

[abdala3000]

طيب يعنى لو انا عايز اعمل المشروع ده
بعد كل التراخيص والورق المطلوب وزيارة امن الدوله او مديرية الأمن
ده بالاضافه للنسخ الاصليه من ميكرو سوفت
يعنى انا عشان اخلص الورق اقعد حوالى سنه
وادفع فوق ال10000 جنيه ده كله غير تظبيط المكان والاجهزه
بسم الله ماشاء الله
وعايزين الشباب يعمل مشاريع ؟؟؟!!!
انا بضم صوتى للأخ alfaster
ولا قانون ولا يحزنون

[m_elmogy]

طيب لو إتمسكت تهرب ضريبي ولا فتح نشاط بدون ترخيص ... ساعتها حيكون إيه العمل ؟؟؟!!!

[Kind.Man]

سمعت ان اى مشروع للشباب له اعفاء 5 سنين من الضرائب فى البداية
ما مدى صحة هذا الكلام؟
و لو الكلام صحيح ماذا يتبقى من اجراءات؟

[m_elmogy]

غير صحيح ...لا يوجد ثمة إعفاء ضريبي على الشباب أو غير الشباب
وطبقا للقانون الجديد تبدأ المحاسبة ضريبيا من أول يوم بدء النشاط

[النمرالمقنع]

طب انا فاتح سيبر نت ومعملتش سجل تجارى ولا ترخيص ومع ذلك بيجوا بتوع الضرايب وبدفع ضرايب عادى
اللى هيا ضريبه الملاهى
هل موقفى كدا سليم ولا ايه ؟؟؟؟؟؟

[newyear2006]

ما تكلفة كل الاجراءت الازمة لنت كافية

[m_elmogy]

ماذا تعني بإجراءات ؟؟؟
إجراءات تأجير مكان والتجهيزات الخاصة به
أم إستخراج بطاقة ضريبية وسجل تجاري
أم ترخيص مزاولة نشط ومكتب عمل وتأمينات
أم تأسيس شركة
أم جميع ماسبق
حدد وأنا تحت أمرك ...

[newyear2006]

إستخراج بطاقة ضريبية وسجل تجاري
ترخيص مزاولة نشاط ومكتب عمل وتأمينات
تأسيس شركة

[alfastar]

يا جمااعه الكلام في الموضوع ده كتير
انت ولا تعمل ترخيص ولا بطاقه ضريبيه ولا غيره
ريح الدماغ وكل عيش بعيد عن الناس بتوع الحكومه ( كلاب الصيد )
و ده اللي ممكن اقدمه للوقت الراهن

[m_elmogy]

إمشي صح وطلع تراخيصك وأوراقك
موضوع النت بصفة خاصة مفيهوش هزار عشان أمن الدولة متدخلة فيه
وإنت حر

[hero_xp10]

يا استاذ m_elmogy
منين اطلع إستخراج بطاقة ضريبية وسجل تجاري ترخيص مزاولة نشاط
وترخيص وزارة الثقافة وكده هيتكلفوا كام لوحدهم ؟؟

[m_elmogy]

حيتكلفوا حوالي ألف جنيه لو النشاط فردي بس حتشتري بيهم شهادة ميلاد لنشاطك المشروع
البطاقة الضريبية : من مأمورية الضرائب التي تابع لها النشاط .
السجل التجاري : من مكتب السجل التجاري .
شهادة مزاولة النشاط : من الغرفة التجارية .
تراخيص وزارة الثقافة : من مجمع التحرير وأمن الدولة .

[hamadayousry]

حيتكلفوا حوالي ألف جنيه لو النشاط فردي بس حتشتري بيهم شهادة ميلاد لنشاطك المشروع
البطاقة الضريبية : من مأمورية الضرائب التي تابع لها النشاط .
السجل التجاري : من مكتب السجل التجاري .
شهادة مزاولة النشاط : من الغرفة التجارية .
تراخيص وزارة الثقافة : من مجمع التحرير وأمن الدولة .

اشكرك علي المعلومات الهايلة دي يا استاذي
بس انا كان عندي سؤال هل وصلات النت التي تخرج من السيبر للجيران ممنوعة ولا؟
وماعقوبتها ؟ علي صاحب السيبر والمشترك؟

[m_elmogy]

الوصلات من السيبر ممنوعة تماما
وتبقى جنحة مصنفات عقوبتها الغرامة أو الحبس أو إحدى هاتين العقوبتين

[hamadayousry]

شكرا استاذ محمد

[yalaa13]

بصوا انا مع الراى اللى بيقول امشى عدل يحتار عدوك فيك
لكن والله عن تجربه موكل عندى موضوع السيبر بالذات هتتعب حتى لو مشيت عدل
واضح ان الدوله بتحارب المشروع ده
ضباط المصنفات متخلفين وفيه ضابط والله سأل بالاتى
(س / فين السيدي الاصلى بتاع الويندوز ؟
ج/ اتفضل ياباشا اهوه
س/ طيب والبرامج ده فين السيديهات بتاعتها ؟
ج/ انهى برامج ياباشا
س/ البرنامج ده اللى اسمه - اسمه ماى كمبيوتر !!!!!!!!!!!!!!!!!!!!!!!!!؟
ج/ ياليله سوده
الضابط لأمين الشرطه قائلا(يله يابنى شيل الجهاز ده وفك الروتر والسويتش ده وهاتلى الجدع ده من قفاه عالبوكس
وبعد س و ج ونيابه وعرض وطول واتضح ان الواد غلبان ومظلوم

** لامؤاخذه ممكن تسترد جهازك
---- عند الاسترداد
ايه ده فين الجهاز
علش احنا اتصرفنا فيه بالبيع علشان معندناش مكان وبعنهولك ب ألف قق قصدى ب خمسمية جنيه وبهمهمه ( كنت هودى روحى فى داهيه )
المواطن ( حسبى الله ونعم الوكيل )
----------------------------------------------------------
معلش هطول عليكوا واقولكم قصه تانيه
باختصار طبعا الديباجه واحده بس المره دى شيل يابنى الخمس اجهزه دول وهات الجدع ده برده من قفاه
وباختصار الوقائع المكرره
طيب لامؤاخذه اتفضل استلم الاجهزه
ايه ده الاجهزه ده فيهم واحد هيكل بس فين الحشو انا مش همضى على محضرالاستلام وهتظلم
امام الباشا الكبير
ياباشا انا فوجئت وانا بستلم بكذا كذا كذا
طيب ومضيت على المحضر بتاع الاستلام يابنى
لا
طيب اتفضل امضى
حاضر
حسبى الله ونعم الوكيل

ملحوظه القصص السابقه حقيقيه حدثت فى بلاد بعيده تركب الشعوب قصدى الافيال
:shutup00:

[m_elmogy]

هو الضابط طالما دخل السيبر يبقى لازم يطلع محمل بقضية وإلا نزل ليه من مكتبه
وعموما جميع مقاهي النت فيها تجاوزات وقضايا مصنفات
لكن الإعتراض هنا على طريقة التعامل وقلة الأدب وإسلوب الضباط ورجال الشرطة في القبض ومصادرة الأجهزة

[hosam2000004]

باشا ممكن لو سمحت تقولى ما هى الاض

[hosam2000004]

باشا ممكن لو سمحت تقولى ما هى الاضرار اللى ممكن تحصلى من مشروع نت مركزى على مستوى منطقة و يا ريت ترد عليا بسرررعة وصلات النت من غير سيبر كدة يعنى
شكراً لك

:shutup00: :shutup00: :shutup00: :shutup00: :shutup00: :shutup00: :shutup00: :shutup00: :shutup00:

[m_elmogy]

أولا : جنحة مصنفات عقوبتها الحبس أو الغرامة أو إحدى هاتين العقوبتين
ثانيا : تشترط مباحث أمن الدولة أن تتأكد من مصدر النت لكل مشترك حتى مستخدمي مقاهي النت أصبح لزاما عليهم أن يدلوا ببيانتهم الشخصية قبل الدخول للنت ، وذلك حتى يسهل تتبع أي مستخدم لبعض المواقع المحظورة
وعليه ففي حالة عمل شبكة مركزية غير شرعية فسوف يصعب على أمن الدولة تحديد المستخدم المطلوب ، وأول ما يتبادر لذهنهم هو التحقيق مع صاحب الشبكة لإستبيان الحقيقة (وإنت معندكش فكرة التحقيق ده بيبقى صعب قد إيه)

[برمبال]

ياريت تقبلوني معاكم في هذا الموضوع الجميل ولي سؤال
بالنسبة للضرائب علي محلي أنا عندي 5 أجهزه كمبيوتر و2بلايستيشن 1 و 2 بلايستيشن 2
كام يكون مقدار الضريبه اوالنسبة كام وهل في مبلغ معين( معافي ) من الضريبة تحت أي بند أرجو الرد

[alfastar]

بالفعل انت معانا اسال و احنا تحت امرك

[m_elmogy]

ياريت تقبلوني معاكم في هذا الموضوع الجميل ولي سؤال
بالنسبة للضرائب علي محلي أنا عندي 5 أجهزه كمبيوتر و2بلايستيشن 1 و 2 بلايستيشن 2
كام يكون مقدار الضريبه اوالنسبة كام وهل في مبلغ معين( معافي ) من الضريبة تحت أي بند أرجو الرد


يتم تحديد مقدار الضريبة المفروضة على نشاط ما بحجم الربح الذي يحققه هذا النشاط وليس بحجم النشاط نفسه (عدد الأجهزة أو التجهيزات)
وعموما لا يوجد إعفاءات إلا في الأعباء العامة التي تم تخفيضها إلى أقصى حد وتمثل مصروفاتك الشخصية
و طبقا لقانون الضرائب الحالي ، ما تذكره في إقرارك الضريبي هو ما سوف تحاسب عليه ضريبيا (إلا أن تكون مبالغا في تحديد مبالغ الأرباح إلى حد غير مصدق)

[alfool_2005]

انا كنت بعمل رخصة من ادارة التراخيص الفنيةاللى فى الاوبرا اللى قدام النادي الاهلى وفى ناس قالوولى ان مكانها اتغير فى القرية الذكية يا ريت حد يفيدني فى الموضوع ده ويقولي المكان فيين بالظبط علشان انا مش من مصر اصلا ان من بني سويف ولو قى حد يعرف ممكن يكلمنى على الاميل الخاص m_alfool_2005@hotmail.com