عايز أعمل بلاغ لجهاز حماية البيئة و محضر إزعاج

[ahmed2611]

أنا مش بفهم في القانون أوي بس لما تكون مولدات كهربه بتاعت معرض( مش عارف الصين و مصر متحدين يعملوه ) شغاله بالديزل كل يوم من العصر للساعه واحده بليل

و طبعا شكمانها بيطلع رصاص و أول أكسيد الكربون و ثاني أكسيد الكربون و مواد دقيقه كلها ليها تأثير شديد على الصحه ده طبعا غير الصوت العالي جدا

و الدخان بيدخل الشقه بتاعتهم

يعني بنكلم في تسمم برصاص و ربو و حساسية في الصدر و إلتهابات القصبه الهوائيه و بلاوي كتير

أنا و إبن خالي عايزين نعمل بلاغ لجهاز حماية البيئة و محضر في القسم

طبعا أنا هاجي معاه أشجعه يعني أنا مش ذي صفه في الموضوع


إحنا كلمنا بتوع المعرض و كانوا كويسين أوي ياباشا و إن شاء الله و اللي عايزه و متخفش و جابولنا بيبسي و تحت أمرك
........
بإختصار ألبونا

و لا عملوا حاجه في الموضوع


بعد القصه الحزينه ده أنا عايز أعرف :

1 - ممكن أنا أعمل بلاغ لجهاز حماية البيئة و هو يعمل بلاغ إزعاج للشرطه

2- هل المعرض أصلا ليه تصريح يعني لازم يعملوا تصريح تجاري عشان الضرايب و كده و هل فيه تصريح بإستخدام مولدات كهربائية

3- إحنا عمرنا ما عتبنا قسم إلا عشان عشان بطاقة 6 جند طيب هل الإجراءات سهله و ميسرة و لا فيه تعقيدات
و لا نروح هناك و مش هيعملوا حاجه بردوا ياريت يعني لو تقولوا الإجراءات المتبعه

4- هل من الأحسن أجيب محامي معانا في القسم

5- ها توجد مواد قانونية لمستوى الضوضاء أو التلوث المسموح به في المناطق السكنية

يا ريت لو أعرف المواد دي


6 - أي نصيحه نحل بيها الازمه دي


ياريت لو حد يرد علينا و يقولنا نعمل إيه عشان أصلا خلاص الكليه هتبدأ بكره


أنا عارف إن ممكن ما يحصلش حاجه بس ما ضاع حق وراءه مطالب

و السلبيه ما تجبش حاجه

[pastelea]

السلام عليكم
اولا المولد بما انة داخل منطقة سكنية يبقي لازم يتعملوا غرفة عازل ودي بتكلف حوالي 7 الاف جنية فبيقلبوها
والعوادم دي دي موضوع تاني والنسب بتاعتها موجودة في قانون 4/94
في شان حماية البيئة
اما بالنسبة للبلاغ فعشان اجيبلك السكة من الاخر انت بتكتب مزكرة وتمضي كام واحد معاك ويا سلام لو كام صورة وبتتوجة لمكتب خدمة المواطنين في وزارة البيئة
ودي عنوانها كورنيش حلوا ورا فندق سونيستا وبتقدمهلم الالمذكرة دي وهما هيقوموا بالواجب وتؤمرني سيادتك

[ahmed2611]

ألف شكر ربنا يكرمك

[Eng.3mrlizm]

شكراً علي الإفادة pastelea
بجد جزاك الله خير .. انا وصلت للموضوع بجوجل مكنتش أعرف إن في منتدانا قسم إستشارات قانونية
ربنا يباركلكم

أنا عندي مشكلة مشابهة مع ورشة ألوميتال في العمارة اللي جنبنا
و المنطقة معروف عنها إنها ميتة .. هدوء قاتل أٌقصد
و هو فاتح الورشة من فترة بس مابدءش قلة الأدب و عدم إحترام الجيران غير من شهر ديسمبر أو يناير اللي فات
تخيل يفضل شغل بماكينة التقطيع للساعة 9 و 10 بالليل كل ده من الساعة 1 الظهر
يعني الناس الطبيعين .. يا بيعملوا الورش دي في مناطق بعيدة .. منطقة ورش .. منطقة فاضية . ما أمكنش و لو إنه ممكن
يشتغل من الصبح بدري و الناس في شغلها من 9 الصبح مثلاً و يخلص علي الساعة 3 و بكدة ما أزعجتش جيراني و إنتهكتش خصوصيتهم بحيث ميكونوش مطالبين بقفل الأبواب و الشبابيك و منع التهوية كل ده بالإجبار عشان الصوت و مع ذلك الصوت داخل و عادي جداً .. أكيد فاهم صوت ماكينات التقطيع مستفز قد ايه و ده طول اليوم فبالملخص إستفزاز
و المحل عبارة عن معرض و وورشة جوه و علطول فاتح الأبواب
و للعلم الآذية دي كانت ممتدة أيام الإمتحانات و لما أكلمه يقعد يقولي طيب أعمل ايه أشتغل إزاي و نظام أبويا ميت و امي في الجيش و الكلام الأهبل ده و في الآخر "أنا آسف" و نص ساعة و ترجع تسمع و لا كأننا كلمناه
و اللي في البيت معايا مضايقين بس مراعين الجيرة خصوصاً إن جار قديم بس الورشة من قريب

و لما كلمته في يوم كلام حاد و قولتله إن مينفعش حد يشتغل و يعمل صوت بالحجم ده لوقت متأخر .. رد رد خلاني معدتش أراعي جار مش جار و الكلام ده و إن كل غلطان يتحاسب
"و أنا أعملك ايه !"
أكيد الرد موضح الشخصية الإمعة اللي بتتعامل معاها
و تاني يوم كلمت واحد قريبي شغال في البيئة
و بعتله واحد من البيئة .. و كان صاحب الورشة هيموت في هدومه من الراجل و الراجل حذره إنه معدش يشتغل بالصوت ده بعد الساعة 5 تاني
و بالفعل 3 أيام بعدها ماسمعناش صوت بعد الوقت ده
و بعد الـ 3 أيام "رجعت ريمة لعادتها الرمة"
و الكلام ده حصل من شهر و شوية
و عشان مكنتش قاعد في البيت علطول في الفترة دي كنت بأطنش
لكن من بعد رمضان معدتش بأسافر و أنا إتخنقت منه كدة و لازم أتخذ إجراء عملي ضده

فتنصحني بإيه ؟ لأني محتاج أخلص دوشة الدماغ دي بسرعة

و في نقطة لقيتك بتتكلم عنها
(اولا المولد بما انة داخل منطقة سكنية يبقي لازم يتعملوا غرفة عازل ودي بتكلف حوالي 7 الاف جنية فبيقلبوها)

فهل تقصد الغرفة العازلة عشان الصوت ! و لا العادم
و هل الورش دي إذا بتشتغل لوقت متأخر لازم يعملوا عازل صوت ؟ لأني متوقع إن يكون للآذية دي قوانين بتمنعها

و هأبقي متشكر جداً للي يفيدني باللي أقدر أعمله و إن شاء الله هأدعي للي يقدر يفيدني أو يشور عليا بحاجة كل يوم في رمضان
و ميرسي علي القسم الهايل ده

[bassemnagy]

جارى ألى ساكن فوقى بينقط على مياه ومش عايز يصلح حمامه أعمل أيه ساعدونى

أنا طلعت عنده لقيت البانيوه بتاعه مكسور كسر كبير ومش عايز يصلحه علشان المصاريف دى تبقى مشكلة مين والحل أيه وأجيب حقى ازاى فى إنتظار مساعدتكم علما بأن الشقة فى مساكن الجيش عمارات التوفيق ألى فى خضر التونى

[Eng.3mrlizm]

ده تحرر ضده محضر في القسم لأن ده في ضرر ممكن يسبب كارثة إذا لا قدر الله السقف وقع ساعتها هنقول ياريتنا
لنا الله في البلد الجميلة دي
و إن شاء الله علي بكرة كدة هأحاول أجيبلك أي معلومات تانية

[Eng.3mrlizm]

جارى ألى ساكن فوقى بينقط على مياه ومش عايز يصلح حمامه أعمل أيه ساعدونى

أنا طلعت عنده لقيت البانيوه بتاعه مكسور كسر كبير ومش عايز يصلحه علشان المصاريف دى تبقى مشكلة مين والحل أيه وأجيب حقى ازاى فى إنتظار مساعدتكم علما بأن الشقة فى مساكن الجيش عمارات التوفيق ألى فى خضر التونى
يا باسم .. الحمد لله وجدت في موقع وزارة البيئة صفحة للشكاوي

يمكنك الضغط هنا (http://www.eeaa.gov.eg/arabic/main/coments.asp)

http://www3.0zz0.com/2008/09/10/10/356744097.jpg

أعتقد هيبقي نوع الشكوي يا إما .. مواد خطرة و توضح في الشكوي نوعية و مدي الخطورة
إما أن تجعلها عامة و أيضاً هتوضح تفاصيل المشكلة

و بعد ما تنتهي من ملئ نص الشكوي

هتاخد رقم للشكوي بتاعتك تقدر تتابع التفاصيل معاهم بالرقم ده

و صفحة متابعة الشكاوي هـنـا (http://www.eeaa.gov.eg/arabic/main/coments_follow.asp)

و طبعاً تحفظ عندك الصفحتين في المفضلة و يستحسن الرقم كمان تكتبه في ورقة عشان مايضيعش
ونصيحة إطلع علي التقارير ذات العلاقة بهذه الصفحة (http://www.eeaa.gov.eg/arabic/info/report_soe2007.asp)بشكواك قبل كتابة نص الشكوي

و أستحلفك بالله تدعيلي مشكلتي تخلص عن قريب
و ربنا معاك و معايا