جامعاتنا زمان وجامعاتنا دلوقتي

[Wanna Help]

جامعاتنا زمان وجامعاتنا دلوقتي
والله لما نيجي نعمل مقارنة بسيطه جدا بين حالها زمان وحالها دلوقتي ممكن نبكي ونتحسر علي حالنا
أنا قرأت في أخر عدد في جريدة أخبار اليوم المصرية ان في أيام الاحتلال الانجليزي أيام جامعة فؤاد الأول كان هناك في الأسكندرية ثلاث كليات تابعه للجامعه وأراد أعضاء مجلس الأمة انشاء جامعة فاروق الأول هناك فتم الاستعانة بالخبرات العالمية التي تفهم في المجال العلمي في كل شئ من مباني وخبرات تعليمية وعلمية
المهم بعدما اتبنت الجامعه في الأسكندرية بفترة ليست بالطويلة وفي عام 1950 جاء وفد من المملكة المتحدة بريطانيا يعني وزار كلية الطب في الأسكندرية وكان تعليقهم ان مستوي الطلاب أقل عن أخر مره تم زيارة الكليه وكان أقل بقليل عن الطلاب في انجلترا فقامت الدنيا في مجلس الأمة علي الحكومة واتهموها بالفساد والاهمال.......
ليه؟؟؟؟؟؟؟؟؟؟؟؟؟؟؟؟؟؟؟ ها ليه؟؟؟؟؟؟؟؟؟؟؟؟؟؟
عشان اللجنة البريطانية قالت ان المستوي أقل شويه يعني
عارفين رد الحكومة ايه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ردها ان الطلاب مستواهم متميز و أن الشهادة بتاعتهم معترف بيها في انجلترا والعالم أجمع طبعا دا كان زمان وأن الطلاب المصريين يدرسون نفس المنهج الخاص بأقرانهم هناك أي في انجلترا
طيب نبص دلوقتي وما أدراك ما دلوقتي ثم ما أدراك ما دلوقتي
يا سباب دلوقتي لمعلماتكم لا توجد أدني مقومات النهوض بالطلاب في التعليم في أي جامعه
التعليم يعتمد علي الحفظ ثم الحفظ فالحفظ وفي النهاية الحفظ برده
يا شباب أنا في في احدي الكليات العلمية و والله مش عارف هاروح أكشف عند مين من أبناء جيلنا لأني بجد شايف كيفية التعليم وشايف ازاي بيجيبوا امتياز و ازاي بيذاكروا وما الي ذلك من منظومة التعليم
يا سباب أنا هنا بتكلم وبنادي لعمل مناقشه موسعة عن التعليم في مصر وازاي لازم يكون وأحلامنا وأملنا لتعليم بلدنا
يا شباب بدون التعليم لن تكون هناك دولة قويه ذات سيادة
بدون التعليم لن تقوم لنا دوله محترمه
بدون التعليم سنكون تابعين
بدون التعليم سنغرق في الديون
بدون التعليم ستزداد البطاله
بدون التعليم سيتحكم فينا الاعداء
بدون التعليم لن تقوم لنا قائمة نحن أبناء الامة الاسلامية
ياريت نشارك ونفكر ممكن نعمل ايه في حال التعليم عندنا

[Wanna Help]

ايه يا شباب محدش رد يعني
كلكم عاجبكم حال جامعتنا وتعليمنا ؟؟؟
مستني ردود

[lonly099]

ربنا يرحم التعليم

[الملك المصري]

بسم الله الرحمن الرحيم

موضوع متميز كما جرت العادة ... وحقيقة واقعية من حقائق الحاضر المؤسفة ....

مشكلة الجامعات مشكلة جزئية واحد اعراض المرض الكبير الذي اصيب به شباب الامة المستهدفة من الخارج والداخل .....

الجامعات هي احد اهم معاقل الشباب وهي مركز ومحطة التحول من الطفولة الى الرجولة وتكوين فكر وشخصية الشاب ....

ولما كان للجامعة دور رئيسي في الحياة السياسية والاجتماعية في منتصف القرن الماضي من حيث مقاومة الانجليز ومعارضة القصر الملكي ومحاولة توعية الناس ونشر التعليم ومساعدة الفقراء ونشر نور المعرفة في اماكن الظلام من مجاهل القرى والنجوع في مصر ....

فركز العدو المتربص بمصر كنانة الاسلام وحامية العرب وراس الشرق الاوسط ... ركز العدو على شبابها فهم قوة الحاضر وحكمة المستقبل ... فبدؤوا بحرب طويلة الامد... تعتمد على محورين :
1- محور داخل مصر :

مثل اعطاء الحكومات المتعاقبة ان شباب الجامعة شباب ليس عليه الا التعلم فقط وانه لو خرج عن دائرة التعلم الى السياسة لتحكمت فيه الاهواء والحماسة الجامحة .... كلام جميل ... طيب الحل ايه يجماعة ... اقمع الحركات السياسية في الجامعات ... وكان هذا حلا بديلا من تبني تلك العقول وتوجيهها ....

بل وتوسع الامر فظنت الحكومة وتوقعت ان الشباب هم اقوى عنصر من هناصر مقاومة الفساد ان وجد فتم تغييبه وشغله بالمناهج العقيمة التي لا يستطيع معها لا تفكير ولا تركيز في سواها ...

2- محور خارج مصر :

بعمل البعثات الى الخارج لاكثر الطلاب ذكاء وموهبة فيتم تغذيتهم بالافكار الاوروبية المتحرره الداعية الى البعد عن الدين وحب المنظومة والشكل الاوروبي ليعودوا الى بلادهم مدافعين ومنتمين الى اوروبا اكثر من بلدهم ...الا من رحم ربي طبعا .....

************

جامعاتنا اليوم اصبحت جامعات يحكمها عصبة أمنية لا تتنبه الا لما يؤذي الحاكم ... اما الخلل والفساد وغير ذلك فلا يعيرون له اهتماما ...
وربنا يولي من يصلح

[Wanna Help]

أخي العزيز ردودك ومساهماتك كما هي العادة من الردود التي أعتز بها بل و أنتظرها لكني هنا أسأل ما الحل من وجهة نظر السادة الأعضاء أعلم أنها الأن المتحكم فيها عصبة من الحرس الجامعي لكن ما الحل للنهوض بالتعليم الجامعي؟؟؟

[wintar_sonata]

اولا شكرا يااحمد علي الموضوع الرائع

وحال جامعتنا منذ فترة وهو لا يسر احد

وحال التعليم .. كلنا نعرفه

واعتقد ان اصلاح التعليم مثلما قال اخي العزيز الملك المصري

ولكني اعتقد ان ن نعتمد نحن الطلاب علي نفسنا بقوة ...
صحيح ان الامكانيات صعيفة.. ولكننا علي الاقل افضل حالا من دول عديدة
ولو قمنا نحن الطلاب الاجتهاد والعلم .. فستعتبر البداية لاصلاح التعليم

لذا لنبدا من نفسنا الاول
وشكرا

[Wanna Help]

عاوزين نناقش الموضوع دا تاني لأنه ماخدش حقه

وواضح من تاريخه انه قديم

لكنه مهم الأن

[raulahly]

http://www2.0zz0.com/2008/05/13/16/572287466.jpg (http://www.0zz0.com)

[waleed mohamad]

للاسف يا جماعه احنا جينا في زمن مش حلو اوي
زمان كانت الجامعات جامعات والمدارس مدارس
مش زي دلوقتي

[alaa7sh]

ياباشا صباح الفل

نحن في عصر البرشاااااااااام

[m_a_aboelsoud]

شكرا يا باشا
كلامك صح و الدليل على ذلك مهزله الثانويه السنه دي

[medhatsat]

ياعم انتوا ظالمين الحكومة !!!
الحكومة هتعمل ايه ولا ايه ..!
مش كفاية التعليم مجاني لحد دلوقتي .
وكل سنة بنزيد مليون ولا اتنين .. هيروحوا فين يعني لما يكبروا ..؟؟
اكيد الجامعات الحكومية عشان ببلاش ( صحيح المصاريف زادت .. انما دة في مصلحة الطالب!!)
_____________________________
..................................
_____________________________
انا معيد في احدى الجامعات المصرية .. عارف ايه المشكلة اللي بتقابلني .
العدد الزيادة بطريقة رهيبة
المكان الضيق ( تخيل غرفة 5 *5 متر مربع يقعد فيها 100 طال وطالبة وطبعا الباب مقفول والشباك ما بيفتحش)
طبعا لا هيكون ليا نفس اشرح
ولا الطالب له مزاج يقعد اكتر من نص ساعة
طبعا دة غير المناهج (الارتجالية )

وطبعا مش هنتكلم على مرتبات الدكاترة عشان عيب .. طبعا لو الدكتور قعد في مكتبه او عيادته احسن له الف مرة من الكلية
فطبعا الكلية دي تعتبر اخر الاهتمامات.

الموضوع مش مجرد فساد ..

الموضوع في المنظومة التعليمية بشكل عام ، بما فيها ( الاقتصاد ومستوى دخل الفرد - سوق العمل - ميزانية مصر للبحث العلمي - ..... الخ)

تحياتي للموضوع المثير

[JAN_12484]

مش كفاية التعليم مجاني لحد دلوقتي .

للاسف هو ده اللى بوظ التعليم ..... التعليم المجانى

[ahmed_ama30]

للاسف هو ده اللى بوظ التعليم ..... التعليم المجانى


المجانية فى التعليم عمرها ما بوظتة والدليل ايام زمان كان التعليم مجانى اكتر من دلوقتى( مكنش فى دروس خصوصية ) ولا الغلاء الى احنا فية اليومين دول مع ذلك كان التعليم تعليم بجد .. بس الايام ديه مشكلتنا الزمة و الضمير فى المدرسين قليل جدا الى عنده زمة غير كده طريقة التعليم المدرسي العقيمة من الابتدائى للثانوى

يجى يدخول الطالب لسة جديد مش عارف اى حاجة عن الجامعة ولا نظمها ولا حتى طريقة التدريس ولا الامنتحانات فيها معتمد على طريقة بتاعت ثانوى الحفظ ثم الحفظ ثم الصم.. يمشى الطالب على هذا الحال ويا تصيب يا تخيب وان صابت يبقى ناجح بالعفية ...غير الدكترة فى الجامعات تلاقى دكتور مادة متفهمش منه اى حاجه ولا كتابة فالطالب يجبر انة يصم الكتاب من غير فهم ...
وفى بعض الطلبة متحبش تتعب نفسها مش عيزه تشغل مخها اصل طريقه الحفظ بتقدى الغرض اصلة كان عايز كلية تنية بس مجموعه مجبهاش دخل الكليه الى فيها وخلاص...
يبقى الحل اننا نشوف الاول التعليم فى المدارس نطلع السلم من اولة من الحضانة اصل التعليم شيئ تراقمى زى العماره مينفعش نبنى من فوق لتحت لازم نرمى اساسات وكل ما الاساس يبقى قوى العمارة تشيل ادوار اكتر وتعيش اكتر مش كده ولا اية؟؟؟؟؟...؟؟؟؟؟:glasses:

واسف طولت عليكم شوية.....

[medhatsat]

المجانية فى التعليم عمرها ما بوظتة والدليل ايام زمان كان التعليم مجانى اكتر من دلوقتى( مكنش فى دروس خصوصية ) ولا الغلاء الى احنا فية اليومين دول مع ذلك كان التعليم تعليم بجد ..
اوافقك الراي
لازم نظام التعليم يتطور
وفي رايي مش هيتحسن الا لما يبقى المدرس مش محتاج يدي دروس عشان يعيش
احسبها انت ..
والسلام