كورسات و شهادات معتمدات !!

[python]

من كام سنة كده و الدنيا كلها بتلف حولين نفسها
و عماله تقول شهادات معتمدة من شركة مش عارف ايه
و كورسات عالمية من اللى هي
و خد الكورس و انت تضمن شغل فى اى حتة نضيفة
و الشهادة دى بئى لو معاك تبئى انت واد من الأخر

و تلائى يا عينى الواد الغلبان من دول أول ما يتخرج
يروح على أى مركز دورات تدريبية من اللى بيشوف اسمه كل يوم فى الجرايد
و يدفع دم قلبه و يقعد كام شهر صاحى نايم بياخد كورس
و بيتعلم حاجات جامدة أوى عمره ما كان هيعرفها لوحده
و يخلص الكورس و يمتحن الواد و ينجح
و بعد كام شهر يبعتوا له الشهادة فى طرد محترم
مكتوب عليه كلام انجليزى كتير
و جواه شهادة و بطاقة زى بتاعة البنك
و دبوس بأسم الشهادة علشان يعلقه على صدره

و ياخد الواد الشهادة و يكتب سيرة ذاتية محترمة
مترتبه و متنظمة وفقاً لقواعد كتابة السى فى المتعارف عليها عالمياً
و ينزل يا حبة عينى للشركات المالتى ناشينوال
و حاطط فى دماغة انهم أول ما يشوفوا الشهادة اللى معاه
مش هيسبوه يخرج من باب الشركة
و هيكتبوا معاه عقد عمل و هو قاعد
وهياخد له كام الف فى الشهر
نظير الخدمات النادرة اللى هو هيقدمها لهم

و يروح الواد و يقدم السى فى
ويقابله واد فى نفس سنة محترم كده ولابس بدلة " ماركو فيرى "
و على وشة ابتسامة باردة كده مافهاش اى احساس
أو تقابله واحدة حلوة من اللى بيطلعوا فى المسلسلات الأمريكانية
و على وشها نفس الأبتسامة
و كأنهم دارسنها فى الجامعة أو واخدين كورس فيها
و ياخدوا منه السى فى ... وشرفتنا .... ابئى عدى ... و ماتقطعش الجوابات
الواد يسأل طب مافيش انترفيو !!
فجأة تلائى الأبتسامة الباردة اتغيرت لأبتسامة عطف و شفقة و حنيه
انترفيو ... !!
و تتحول الأبتسامة بتاعة الشفقة لنظرة حادة
و تترسم على وشهم نظرة " انت عبيط يا بنى "
ان شاء الله لما نحتاج هنتصل بيك على طول

و يخرج الواد من أول شركة راح لها و هو مش فاهم حاجة
و يصبر نفسه و يقول ماشى دول مش عايزين حد
خلاص ندور على الشركات اللى عايزة ناس تشتغل

و يبدأ رحلة حلوة مع جرنان الأهرام بتاع يوم الجمعة
و مواقع التوظيف اللى النت بئت غرقانة بيها اليومين دول
و يروح لشركات عايزة ناس تشتغل
و يقابل نفس الواد و نفس البنت اللى قابلهم فى الشركة الأولانية
و على وشهم نفس الأبتسامة اياها
و يسمع نفس الكلام

بعد كام شركة كده
يقرر الواد انه يتنازل و يخليها عليه المرة دى
و يروح يدور فى الشركات العادية
و يبتدى يعرف حاجات جديدة
ماتعلمهاش فى الكورس اللى دفع فيه دم قلبه
يبتدى يعرف ان الموظف المبتدىء لازم يكون خبرة سنتين
يعنى لما تلائى اعلان طالبين ناس مبتدئين
اعرف انهم عايزين خبرة سنتين
و طبعاً دى حاجة إحنا لازم نحفظها مش أكتر
لأن لو حاولنا نفهمها مش هتتفهم
يعنى ايه مبتدىء و خبرة سنتين
انا عن نفسى مش عارف لغاية دلوئتى
لو فى حد عملها قبل كده يا ريت يقولى
و يعرف كمان إن مواعيد الشغل " الطبيعية " من 10 الى 12 ساعة
و ان موضوع 8 ساعات ده يعتبر " بارت تايم " يعنى حاجة كده دلع
و لازم كمان الواد يكون صايع و مقطعها
لأنه لو هيتفق مع شركة على مرتب
ممكن ياخدوا منه فلوس أول كل شهر
فلازم يبئى واد صايع و أرارى
علشان يعرف يتفق على قرشين يعرف ياكل بيهم

ده غير انه لازم يجيد على الأقل أربع لغات حية و سبع لغات ميته
و يكون بيعرف يغسل ويمسح ويكنس و يعمل شاى و قهوة
و لو الشغل اللى هو هينزل فيه لازم يبئى فيه " تيم ورك "
لازم يكون بيعرف يشتغل كتيم ورك لواحده
يعنى الواد لازم يبئى فى امكانيات فريق
زى المارينز بتوع البحرية الأمريكانية
الواحد منهم ينزل على بلد يقفلها
فانت لازم تنزل على الشغل تقفله
مافيش حاجة اسمها تخصصات
انت يا باشا متخصص فى كل حاجة

و يرجع الواد يا حبة عينى
" مهزوماً مكسور الوجدان "
و ان كل اللى عملته له الشهادة
انها ادته فرصه انه يروح الشركات دى
و يحط فيها السى فى بتاعته
و كتر خير الدنيا على كده
و أكتر من كده يبئى طمع و افترا
مهو الواحد مش هياخد كل حاجة من الدنيا
كفاية عليه حاجة واحدة
و انت خدت شهادة ... خلاص عايز ايه
عايز تشتغل كمان ...
انت عبيط يا بنى !!

[ah_mmed]

http://i1.trekearth.com/photos/9034/crazy81.jpg

[ah_mmed]

http://i1.trekearth.com/photos/9034/crazy81.jpg

[طارق احمد خليل]

الواد قلبه بيوجعه واشتغل كاشير فى مطعم او مندوب مبيعات او مساعد رقاصة

[HAZOOMA]

طب دلوقتى انت عرضت المشكلة ايه الحل من وجه نظرك أن الواحد بعد ما يخلص الجامعة ولا الشهاده اللى طلع عين اهله علشان ياخدها وفى الاخر أكتشف ان الموضوع كله فهوله وواسايط ويارب يكون الاسبيلينج صح بتاع الكلمه ههههه ولا يجيب من الاخر وياخد كورسات بلا جامعة بلا قرف ومادام الكورسات مش جايبة همها طب ما يقعد فى البيت أحسن بلا تعليم بلا كلام فارغ
ياخى العزيز ربنا قال أسعى ياعبد وانا اسعى معاك الواحد بيعمل اللى عليه والتوفيق بتاع ربنا أهم حاجة أرمى حمولك على الله بس لازم يكون فى أساس علشان الواحد يقدر يسعى بيه ولا ايه ما تخليش الدينا تسود فى عينك ولا اى حد يعقدك فى حياتك وياحسيسك انك اقل واحد فى الدينا دى كلها لازم الواحد يكون عنه هدف وبأذن الله ربنا هيكرمنا جميعا بعتذر للاطاله وارجوا ان يكون كلامى ما يضيقك وربنا يوفقك سواء فى الدراسه او الحياه العمليه

[sara4ever]

ههههههههههه والله الكلام ده مية مية بس يا جماعة عايزين حل بجد كده الشباب بيضيع المشكلة كبيرة بجد مش صغيرة

[Programing®Addict]

طب انا هاقلك ياعم يالي ببتكلم انت
ايه رايك في واحد عنده مشروع قنبله يقدر ينقل مصر في حته تانيه من ناحيه البرمجه وسعرنا علي النت (كعرب يعني )
ويروح يقعد مع ناس يقولوا ليه انت جامد اوي والفكره في منتهي الذكاء
ممكن تجيبلنا دراسه جدوي ليها واحنا هانبقي نشوفك بعدين
وواحد تاني معاه واسطه وبيقوله انا بفكر اعمل موقع هايف يقوله انا تحت امرك حبيب قلبي ....
انا اتخنقت من دنيتي والله من الي بشوفه
اد ايه حلوه اوي مجال البرمجه في مصر وفي الوطن العربي
ياجماععه انا بقالي فتره كبيره اوي بدرس فيه ولوحدي وبقعد مع ناس واخده شهادات وفي كاريير شغل محترم جدا والقيهم بطيخ
بذمتك مش حرام
وجاي زعلان اوي انك مش لاقي شغل وانك اخت شهادات
هيا لازم يعني الشهادات الي هاتشغلك .....
ياعمي الله يرحم جيفارا اهو كلمه في الجون احلامي لاتعرف حدودا وادينا ينحلم لما هانومت من كتر الحلم اصل حتي الاحلام بقيت بفلوس وغاليه علينا اوي علشان لسه ورانا دراسه
ربنا يوفقنا ويكرمنا ان شاء الله ذي ماكرم السادات كده

[python]

قشطة على الكلام الجامد


بص يا عم حازم
وشوفى يا ست سارة
و ركز معايا يا عم " على بالو "

الحكاية زة ما انتوا شايفين
و زى ما هو وضاح

ان فى ناس بتعلق احلامها على شوية كلام فارغ
شهادات و دبلومات و حوارات مالهاش معنى

يعنى لما واحد يبئى مالهوش فى البطيخ
و قاعد بيدور على اى اشتغالة يعملها فى نفسه
ينزل يا خد كورس فى اى بتاع
و يقولك انا واد مخلص و معايا شهادات
و بفهم الكفت

الويب ديزين .... يا سلام ... ده لعبتى ... ده انا اللى عملت الديزين بتاعه..

البرمجة ...... واو ..... انا بتكلم ست لغات برمجية و اتنين شاورمة..

و دول طبعاً فى منهم كتييييييير


و فى ناس تانية كويسة و بتفهم و بتحب الحاجة اللى هى داخله تتعلمها
و عندها خلفية مش قليله على الموضوع

و تبص تلائى اعلانات ماليا الدنيا
ان الكورسات و الشهادات هى السبيل الى الخلاص
و هى المستقبل
و ان اللى معاهوش شهادة معتمدة هيبئى واد بيئة
و محدش هيعبره
و ان علشان تشتغل لازم تبئى واد معتمد

بس هى الحكاية مش كده خالص

انت علشان تشتغل لازم تبئى واد كويس فى مجالك
هى دى النظرية
هو ده الصح

إنما تعالى بئى سيادتك اتفرج
تروح تشتغل فى البرمجة ... مثلاً.
و تيجى تلائى واحد اقدم منك فى الشغل
و قاعد بيعمل " كونيكشن استرنج " على داتابيز
و هو بيعمله يحسسك انه عبقرى
و ان مافيش غير تلاتة فى مصر اللى بيعرفوا يعملوا كونيكشن على داتا بيز

المهم

ماعلينا من الكلام ده

انا كل اللى عايز اقوله

ان حكاية الإعلانات اللى كل شوية ماليا الدنيا دى مالهاش لازمة
كل ما أدخل فى حتة الائى
... كورسات أوركل
... كورسات مايكروسوفت
... كورسات بالجبنة
... كورسات محشية كورسات

و الحكاية اكبر من الكورسات والشهادات يا جدعان

و يا ريت ان محدش يعلق حلمه على حبال دايبه

يعنى الحكاية تبئى أكبر من انك عايز تشتغل فى شركة محترمة و خلاص

لاء

الشركات المحترمة أو غير المحترمة مش مضمونة بالمرة

إنما المضمون انك تعلم نفسك كويس

و ساعتها هتعرف تعمل ايه بالعلم اللى عندك ده

و ان موضوع الشركات اللى ما بتشغلش حد ده يبئى ولا حاجة و طظ فيهم

[eslammohamed]

كلامك مظبوط الي حد كبيييييييير

[A.B.D]

هههههههه
من احلي المواضيع اللي شوفتها والله
كلامك مظبوط جدا ياريت الهدف الأول من الكورسات يكون العلم نفسه مش شهاده عشان الشغل
وربنا معانا بقي

[python]

A.b.d

ربنا يوفق الجميع

[arrowxen]

السلام عليكم ورحمة الله وبركاته

لو سمحتم ياجماعة أنا عاوز حد يفيدنى فى معلومة، أنا معايا MCTS فى ال Windows وال Web وعاوز أدخل امتحان 70-529 فى ال Distributed Applications وفى على النت إصدارين لكتب ال ActualTests فى شهر 8-2006 و شهر 3-2007 أنا مش عارف الامتحان فى مصر يخص أى اصدار منهم علما بأن الWindows وال Web كانوا الإصدار بتاع شهر 11-2006 مش إصدار 2007 يعنى مش أخر إصدار علشان ال Test Engine إتغير بالنسبة للإمتحان فى أوروبا لكن فى مصر كان لسه ماتغيرش وده معناه ان مش دايما أخر إصدار بيبقى هو المطلوب لكن المهم الاصدار اللى إمتحانه موجود فى البلد اللى بتمتحن فيها، ودلوقتى أنا مش عارف آ إصدار اللى المفروض أذاكره.
ياريت حد يفيدنى أو يصحح لى المعلومة لو فيها غلط.
وده الميل بتاعى لو حد يبعت لى الكتاب المطلوب أو يبلغنى بأى معلومة
جزاكم الله خيرا
Arrowxen@hotmail.com

[ayman gad]

ليه التشائم ده خليك متفائل عشان ربنا يفرجها واتعب وخد دورات جمب مؤهلك عشان ترفع من مستواك العلمى وربنا قال اسعى ياعبد وانا اسعى معاك ومفيش حد بيتعب وحقه بيضيع اللى بيتعب بيلاقى