سؤال حول المرونه السعريه للطلب

[loveme7448]

السلام عليكم ورحمه الله وبركاته

المرونه السعريه للطلب انا فهمتها كويس والوقانين كمان حفظتها
وكمان لما بتكون = 1 او < او >

يعني عرفت انه امتى السعر وامته انزله علشان احقق اعلى Tr ايراد كلي

لكن بجد المعنى كده مش فاهمه

يعني هل هيا فايدتها بس علشان اعرف ان كنت هرفع السعر او اقلله علشان الـ Tr يزيد ؟؟؟



حد بس يقولي كده اصلا مش واضحه بالنسبه لي

[mada0202]

انت بدأت CMA ولا ايه

اقولك يا باشا


المرونة السعرية ببساطة ان التحكم فى العرض و الطلب على المنتج بيحدده السعر
و كل ما زادت المرونة السعرية ازداد تأثر العرض و الطلب
و طبعا ده اثره بيلاحظ على حسب نوع السوق


بمعنى ايه.

نفترض انك بتبيع سيارات
طيب معنى ايه المرونة السعرية - لو مثلا انخفض سعر السيارة من 2000$ الى 1800$ هيزداد الطلب من مبيعات 10 سيارات الى 15 سيارة .
او لو سعر السيارة ارتفع من 2000$ الى 2000$ هيقل الطلب على السيارة فتكون المبيعات 8 سيارات بدل 10


و ده معناه ان الطلب فيه علاقة عكسية مع السعر -كل ما زاد السعر قل الطلب و كل ما قل السعر زاد الطلب

و العكس مع العرض فيه علاقة طردية

طيب انت عندك كذا نوع من الاسواق

فيه سوق المرونة السعرية فيه عالية جدا perfect market و ده بيتأثر لاقل تغير طفيف فى السعر

و فيه السوق الاحتكارى monoply market و ده علشان الاحتكار مهما ارتفع او قل السعر الطلب لا يتغير لعدم وجود منافسين
و فيه اسواق ما بينهم تتأرجح فيها المرونة

مش عارف يا احمد هو ده اللى انت كنت عايزه ولا حاجة تانية

[loveme7448]

الف شكر يا حبي



بجد ربنا ما يحرمنا منك كل حاجه وضحت


بس هو فعلا في الحياه العمليه بتحسبوا المرونه ومن خلالها بتعرفوا اذا كنتوا هترفعوا الاسعار او لا ؟؟؟

[hamadam2002]

يظهر ان CMA سهلة
ده الحاجات دي خدناها في الكلية
طبعا مفيش كلام بعد كلام محمد باشا
بس كان في معلومة كمان كنت عرفتها حبيت أضيفها يمكن تنفع
هي من ضمن الحالات الشاذة للعرض والطلب
وهي عبارة عن حاجاتين
أول حاجة اسمها سلع الفقراء وبيكون مثال عنها رغيف الخبز
والنوع ده من السلع لا ينطبق عليه نفس قوانين العرض والطلب
بمعنى انه لو ارتفع سعر رغيف الخبز هيزداد الطلب عليه أكتر وليس العكس كما هو متوقع
حيث ان الفقراء سيتجهون الي استهلاك مزيد من الخبز لاشباع حاجتهم
والعكس صحيح اذا انخفض سعر رغيف الخبز فالطلب سيقل عليه حيث سيتم توجيه الفائض في الموارد الناتج عن انخفاض سعر الخبز لاستهلاك سلع أخرى
انا حاسس اني عقدت الموضوع لذلك هتكلم بالبلدي
يعني نفترض ان الأسرة دخلها في اليوم 1 جنيه وبتصرفه كله على الفطار للتبسيط يعني
ورغيف الخبز بخمس قروش
وان الاسرة بتحتاج بنص جنيه طعمية مثلا وبنص جنيه عيش
لو افترضنا ان العيش زاد سعره وان عشرة أرفغة اصبحت بستين قرش ايه اللي هيحصل
هيبدأ الطلب على الخبز يزيد وان كل فرد هياخد حصة أكبر من الخبز الحاف عشان يشبع
والاستهلاك من الطعمية هيقل لأن مفيش موارد متاحة للطعمية
والعكس صحيح طبعا لو انخفض سعر الخبز
وهيبدأ نصيب كل فرد من الطعمية يزيد نتيجة الفائض الناتج عن أنخفاض سعر الخبز



ندخل على النوع التاني من السلع وهي اسمها سلع المباهة او الأغنياء
ودي لو زاد سعرها بيزيد عليها الطلب جدا ولو انخفض سعرها بينخفض معاها الطلب برضه
زي ايه
السيجار الفاخر مثلا
بتلاقي سعر السيجار الواحد 100 جنيه
وتلاقي الراجل ماشي ويقولك انا بشرب نفس السيجار اللي بيشربه كاسترو او صدام حسين قبل ما يتبهدل البهدلة السودة دي فكل ما يزيد تمن السيجار ده هو مستعد انه يشتري منه
انما لو رخص تمنه وبقى ب50 جنيه مثلا هو ما زال غالي
انما هو يقولك لا ده كده رخص اوي ده من بكره هتلاقي الناس كلها ماسكة نفس السيجار بتاعي ويبدأ يدور على ماركة تانية تكون غالية برضه

أرجو اني أكون وضحت
طبعا انا هرد على سؤالك التاني بس من وجهة نظري النظرية يعني بالنسبة للدراسة الاكاديمية لأني لسه ما اشتغلتش
بس اللي أعرفه ان اكيد الحاجات دي بندرها عشان هنستخدمها في الحياة
انما أعتقد ان مش كل اللي هنا بيتستخدموا السياسات دي
عشان التحكم في السعر مش بيكون سهل اوي زي بره
لان السوق عندنا متقلب وفيه عوامل كتيرة جدا بتأثر على السعر منها التكلفة والضرائب والمنافسة والي أخره من العوامل دي
انما انا لاحظت ان في الفترة الأخيرة بدأت تظهر بعض شركات بتعمل أبحاث تسويقية
وأعتقد ان من ضمن شغلهم الموضوع ده عشان يتأكدوا انهم نازلين بأحسن سعر
أرجو أني أكون أضفت معلومة ولو بشكل بسيط
انا حبيت بس أقول اللي أعرفه
وانتم اساتذتنا يعني
وتحياتي ليكم يا أحمد ويا محمد
أخوكم أحمد حسين

[loveme7448]

الف شكر يا باشا للتوضيح


وانا كمان هقولك مثال على حاجه الفقراء وهيا الملابس المستعمله



كل ما دخلك يزيد الطلب هيقل عليها


ومرسي يا مان على التواصل بجد الف شكر

[hamadam2002]

العفو يا أحمد باشا
على أيه يعني
دي حاجات بسيطة
وياريت الواحد يقدر يخدم بجد يعني
وألف شكر ليك على ردك الراقي ده
وربنا يوفقنا جميعا

[loveme7448]

العفو يا أحمد باشا
على أيه يعني
دي حاجات بسيطة
وياريت الواحد يقدر يخدم بجد يعني
وألف شكر ليك على ردك الراقي ده
وربنا يوفقنا جميعا



:clap0000: :clap0000: :clap0000:



:icon30: :icon30: :icon30: :icon30: :icon30: :icon30: