ارجو من الجميع ابداء الرائ للافاده والتطوير(عاجـــــــــل)

[حسام محمد]

بسم الله الرحمن الرحيم
في البدايه كنت ادخل هذا المنتدي بغرض ان اري واحمل منه كل جديد
ولم اكن اعرف كيف اضيف برنامج او لعبه او اي شئ
ولا حتي كيف ارد علي الاعضاء
وكنت في البدايه عضو لمنتدي اخر بدون ذكر اسماء طبعا
فوجدت في هذا المنتدي ما اريده
فتركت المنتدي الاخر
وبما اننا جميعا نريد ن نجعل هذا المنتدي اجمل واجمل
فارجو منكم مناقشه هذا الرائ

وهو المتعلق بمستوي العضو(مبتدئ -عضو-عضو نشيط-عضوسوبر -......الخ
ازاي يتساوي عضو سهران طوال الليل في لعبه عاوز ينزلها عالمنتدي او برنامج او اي شئ يفيد به الاعضاء
بعضو يدخل يحمل هذا الشئ ويكتب (مشكور) وغالبا لا يكتب :5headache
فيزيد صاحب الشكر (مشاركه) ولا يزيد صاحب البرنامج شئ الا اذا قال له العفو او او او
كيف تتساوي هذه المشاركه الايجابيه بمشاركه لم يستفيد بها صاحب الموضوع ادني استفاده
فيجيب علينا تحفيز هؤلاء الاعضاء حتي يسعو في تطوير هذا المنتدي :5bowtie:
فمثلا ان يحسب لكل من يشكر صاحب الموضوع (بمشاركه)
وان يحسب كل او نسبه معينه من الردود كمشاركات لصاحب المنوضوع الاساسي ليزيد من رتبته
فمن الظلم :5bomb:
ان يضع عضو ما مثل مافيا او غيره موضوع
ويلاقي اقبال شديد ويبلغ عدد الزوار في الموضوع الالاف وان يتساوي بانسان كسول يرد فيقول شكرا
تاني حاجه
الواحد بيلاقي برنامج او لعبه بيدخل علي موضوعها المئات ويحملها المئات
وعدد الردود لا يتعدي العشرين عضو :eek:
فارجو من المشرفين في هذا المنتدي
ان يجعلوا التحميل مقابل الرد :5forbidde
وبذلك نكون قد حفظنا الشكر الواجب لصاحب الموضوع :D
وحكمنا بالعدل لرتبته والا يتساوي بعضو اخر

باختصار وارجو منكم الردود هل كلامي ده سيفيد المنتدي ام لا
حتي نستفيد جميعا :5crackup:

1.لايستطيع اي عضو بتحميل اي برنامج من المنتدي دون مشاركه شكر او اي شئ
2.اضافه نسبه مشاركات لصاحب الموضوع عائده من عدد الردود والزوار

علي كل من يريد ابداء الرائ

اذا كنت تريد تطبيق الرائ الاول
كتابه (ا)
اذا كنت تريد تطبيق المبدئ الثاني
كتابه (2)

اذا كنت تريد الوضع الحالي
كتابه (لا)
مع زكر السبب
يمكن اكون غلطان
وشكرا لكل شخص يبدي اهتمامه باقتراحي

والسلام عليكم :5shocking

[movieman]

انا فعلا معاك ان حرام الواحد يتعب في موضوع في الاجر مايلاقيش اي كلمه شكر بس احنا نقدر نعمل ايه غير ان احنا ندعي عليه

[AERO]

That Is Right Although Iam One Of The Cheer Leaders :)))))))))))))))))))))

[حسام محمد]

ارجو الالتزام بالتصويت
1 او 2 او لا

[kokoeffect]

انا معاك يا باشا في الرأي الاول .اما الرأي الثاني. فلا اعتقد بانه صحيح بالنسبه لي . لان الشكر يجب ان ينبع من داخل الانسان وليس لمجرد المصلحه والموضوع ده لو فرضنا انه اتعمل هتلاقي مثلا واحد حطلك ابتسامه .علشان يحمل ما يريد واخر يضع كلمة شكر واحده . فتتمني ان لم يشكرك .لانك تعلم ان هذا الشكر ليس من قلبه.
وعلي فكره مافبا اتكلم في الموضوع ده والمشرفين اقناعه بالعكس .كما ذكرت سابقا.وتقدروا تشفوا في
منتدي الاقترحات والشكاوي..........
ولهذا انا تصويتي سوف يكون علي رقم (1)

[حسام محمد]

احترم رأيك
ولكني كنت اعتقد ان الاراء سوف تكثر علي الرائ (2)
انته فجئتني

[kokoeffect]

انا معاك ومين فينا مش عايز ان الرأي التاني يطبق . بس انت شوف النتيجه النهائيه وشوف الاساس اللي اتبني عليه كلامي وسوف تجد انه صحيح .

[movieman]

مادام رقم 1 ماينفع يبقى رقم اتنين او انت ممكن تعمل المرفقات في رساله خاصه او حتى تعملها باسسوورد عشان الي ينزل ومايكتبش تبعتله المرفق او الباسسوورد على رساله خاصه

[lord ahmed]

يا جماعه والله ماله لازمه الكلام دا خالص مفيش فرق هنا بين اى حد
كلنا سواسيه انا مثلا كنت ايه فى الاول عضو مبتدأ والاسم دا كان بيغيظنى دا يما
بس فكرت قلت ليه مبقاش نشيط او ممتاز ودا بسب المواضيع والردود عليها
فأى عضو مبتدأ هنا مسيره فى يوم هيبقى نشيط
وعلى فكره مش الاعضاء وبس اللى بيدخلو المواضيع يحملو ويضيفو مشاركات ....مشكور مثلا
عندك بعض المشرفين ..بردو بيدخلو ويقولى مشكوررررررر
انت رائع حاجات كدا
فمفيش فرق بين كبير وصغير
وبين غنى وفقير
وبين عضو مبتأ ومشرف ...شوف لدرجه ايه
فدا كان تفسبر الاى الاول
اما الراى التانى اعتقد ان جميع الاعضاء اللى هيدخلو هنا هيختارو الراى الثانى
اما الراى الثالث
فأنا عن رايى
بقول (لا )

[jeeto_sf]

لا
__________________

the games of ps and ps2 only here (http://www.dvd4arab.com/forums/showthread.php?t=34154)

[gamer]

اتمنى ان نلتزم بالتقسيم , و هذا الموضوع مكانه منتدى الاستفتاءات و التصويتات .

[gamer]

اعتقد انك تكتب الموضوع لتفيد الناس مما انت تعلمه , و ليس مقابل كلمه شكر اخى حسام محمد .
ربما تكون كلمه الشكر مهمه , لكن فى كل الاحوال انت تشتهر فى المنتدى بمجهودك و ليس بعدد كلمات الشكر فى موضوعك .

[movieman]

سؤال واحد يا جيمر انت عملت موضوع ( تقري عن العاب 2004 و 2005 ) وموضوع ( سلسه التعليم ....) لو محدش فيهم عبرك بكلمه في الموضعين تظن انك هاتكمل انا لما عملت موضوع العاب جديده طحن للمعرفه و ليس للتنزيل كنت بحدثه كل يوم بعدين لما لم اجد اي واحد يرد عليا بطلت احط فيه اي حاجه بس حكايه الشكر ديت حاجه بتخليك تستمر في موضوعك

[gamer]

اكيد كنت هاكمل يا استاذ , لو انت كنت موجود من زمان فى منتدى الالعاب كنت هاتعرف انى كنت باكتب الموضوع و ماكانش حد بيرد غير واحد كل كام يوم , لكن يا ترى انا اتخنقت و قلت لا انا مش هاكمل .

شوف دلوقت الحكايه ماشيه ازاى , الحمد لله عدد الاعضاء اللى بيشاهذوا منتدى الالعاب فى زياده مستمره , و طالما انت موضوعك جميل يبقى اكيد الناس هاترد عليك .

اسأل kokoeffect على موضوعه الرائع ( العاب المستقبل ) اللى عمل فيه مجهود كويس فى الاول لكن ماحدش رد عليه , و هو كان متضايق و مش عاوز يكمل , لكنى قلتله لو كملت و عملت مجهود اكبر فأن الاعضاء لازم يردوا عليك لانك تستحق , و فعلا ده اللى حصل و حاليا موضوعه من اجمل المواضيع .

[حسام محمد]

علي فكره يا استاذ جيمر
انا ولا قولت مش هكمل ولا قولت حاجه
انا كل اللي اقصده بهذا الرائ هو ان نحفز الجميع بان يجتهدوا بمواضيع هامه
ليزيد عدد زوارهم
لا اكثر واظن هذا فائده للكل
وعلي فكره يا جماعه
انا من اقل الناس اللي ليها مواضيع بالمنتدي
انا من المقصرين
يمكن كان المفروض حد غيري هو اللي يفكر في ده
ويمكن انا انضر كتير لو حصل اللي انا بقوله
بس بجد انا حسيت ان ده في صالح المنتدي
بالذات المشرفين والاعضاء الجامدين
زي: مافيا
لورد احمد
جيني
والكثسرين
وشكرا
واخيرا وليس باخر
اعتزر عن كتابه الموضوع خارج المكان المخصص له
جل من لا يسهو

[GENNI]

أولا ... أحب أشكرك يا حسام على موضوعك الممتاز ... وأحب أشكرك كمان على اعتباري من "الأعضاء الجامدين" ... بس أنا مش جامد قوي يعني :p ...


ثانيا ... بالنسبة لرأيي فهو لا ...


ثالثا ... بالنسبة للأسباب ... فهي تشبه أسباب الرفض السابقة ...


بص يا حسام ... أولا بالنسبة للـ "لقب" ... المفروض ان انت يكون تقديرك الشخصي لنفسك و لمجهودك أهم من تقدير اي حد ... و صدقني هو ده اللي هايخليك تستمر ...


أنا معاك ان كلمات "شكرا" و "انت راجل كده :icon_thum" و "أنا مش عارف من غيرك كنت عملت ايه" كلها بتفرح الإنسان جدا و تديله دافع انه يستمر ...
و على الجانب الآخر ، فإن كلمات "ايه القرف ده" و "أهو ده الاستعباط بعينه" (زي ما اتقالت بالحرف الواحد كده لعضو كان مشارك بحاجة مكررة ... بلاش ... خلينا قاعدين ساكتين) أو حتى عدم الرد ، كلها بتخلي الواحد حزين و مكتئب و مش عايز يدي حاجة تاني ...


بس الكارثة هي انك تكون بتدي الحاجة و مستني قصادها كلمة "شكرا" كقيمة أو ثمن ...


إحنا مشكلتنا أكبر من كده بكتير ... أنا مش عايز أعقد المواضيع بس أنا عايز استغل الفرصة (أصل انا استغلالي و زي ما انت عارف الحياة فرص :evil4: ...


مشكلتنا كعرب ... ان احنا بنؤمن قوي بالـ "كلمة" ... علشان كده تلاقينا نقعد نتكلم كتير قوي لغاية لما مايبقاش عندنا وقت ننفذ أي حاجة من اللي احنا قولناها ... أوعى تكون فاكر اني باتكلم عليك أو على اي حد تاني ... أنا باتكلم عننا كلنا ...


أنت متخيل ايه اللي ممكن يحصل لو نفذنا اللي اقتراحك ...

الاقتراح الأول : انت كده بتشتري حب الناس ... هاتلاقي ناس كاتبالك "thx" علشان تختصر الوقت و ناس واخدة نسخة من كلام بعضيها و كاتباه تاني ... و ساعتها هاتندم ان انت طلبت كده ... لكن لما تلاقي ان الملف اللي انت رفعته فيه 50 واحد نزلوه و منهم واحد بس شكرك ، هاتحب الواحد ده جدا جدا لأن هو عمل حاجة مش مجبر عليها لكنه عملها بس علشان هو عايز يعملها ... و هو ده الحب ...


الاقتراح التاني : هاتلاقي الناس اللي بتكتب مواضيع (معلش في اللفظ) بتشحت ناس ترد عليها علشان تزود رتبتها في المنتدى ...


صدقني يا حسام ... العواطف دي أغلى شيء في الوجود ... بس عارف امتى؟ ... لما تكون من غير ثمن :cool: ...


أنا آسف ... طولت عليك ... بس ماحبتش أفوت الفرصة من غير ما أقول رأيي (أصل أنا مستغل زي ما قلت لك :D ) ...


يلا بقى ... هاتلاقي مواضيعي موجودة في التوقيع بتاعي ... خش اشكرني عليها :p

[gazoline]

أنا اقتنعت بكلام جينى جدا .... بس أنا كان نفسى ان الموضوع لما يتحط ... يقوم بقية الأعضاء بابداء رأيهم وليس كلمات شكر ... فالرأى يحسن من أداء الفرد سواء الرأى كان سلبى أو إيجابى .... وهو ما أسعى اليه فى موضوعى ... والذى أستغرب له أن هناك أكثر من ألف واحد زاروا الموضوع ولم أجد بينهم سوى عدد قليل شاركونى فيه ... انا لا أحب المجاملات ولكنى أحب الأراء ... ( حسن من كذا ... أو طور فى كذا .... ) وليس كلمات شكر ليس لها طعم

بس أهم حاجة ان كل ده لن يمنعنى من عمل المكتبة التى أحلم بها .... ولن أقف عند حد معين بل سوف أزودها بكل الطرق التى تجعلها ناجحة .... ويكفينى أن هناك أكثر من ألف زائر سوف أرضى بمطالعتهم الموضوع وهذا هعتبره المقياس الأساسى لقوة موضوعى .... وأرجوا ألا أكون أزعجتكم بكلامى .... وشكرا

ملحوظة سأختار لا

[lord ahmed]

وانا كمان عجبنى جدا راى Genni
مع انى قلتلك راى فى الاول (لا)
ومع جازولين فى الراى فعلا لو الاعضاء تدخل تقول رايها عن الموضوع بالايجاب او السلب
هيبقى افضل من كلمه شكر
تعالى مثلا نروح للموضوع بتاعى ......تشغيل محركات الالعاب
عدد اللى بيدخلو على الموضوع دا محدود جدا ومعروفين كمان بأسمائهم
والباقى بيدخل يحمل
وانا مش عايز اكتر من كدا.. بس بيدخلو يقولو رايهم وبيطلبو طلبات واستفسارات ما هى دى حاجه طبعا تشجع
ربنا يوفقك ياحسام بس انت حاول تعمل مواضيع فيها طلبات واستفسارات وانت هتلاقى اقبال عليها جامد جدا
واهم حاجه اسم الموضوع اللى يشوفو يخاف
******
سؤال للاخ جينى .........انت عندك كام سنه
انا حاسس ان سنك كبير يعنى 50 او 60 سنه
لان كلامك حلو اوى وبيعجبنى جدا انت كلامك بالظبط عامل زى كلام الاب اللى بينصح ابنه
انت ايه رايك لو نسميك الاب الروحى للمنتدى هيبقى اسم جامد اوى
*************
معلش ياحسام خرجت عن الموضوع الاساسى بس كان فى كلمتين لازقين فى زورى عايز اطلعهم للاخ جينى
والحمد لله طلعوا بسلام
وبالمناسبه ياحسام ادخل يلا على موضوعى وضيف مشاركه ....هههههههههه
انت لسه قاعد ....

[GENNI]

سؤال للاخ جينى .........انت عندك كام سنه؟ انا حاسس ان سنك كبير يعنى 50 او 60 سنه ... لان كلامك حلو اوى وبيعجبنى جدا انت كلامك بالظبط عامل زى كلام الاب اللى بينصح ابنه ... انت ايه رايك لو نسميك الاب الروحى للمنتدى هيبقى اسم جامد اوىهاهاهاهاهاهاهاهاها ...
أنت مين اللي قال لك على سني الحقيقي :p ...
يا باشا أنا ماشي في الـ 61 ... إه قصدي في الـ 21 ...
و بلاش موضوع الأب الروحي ده بدل ما نلاقي الـ Interpool و الـ FBI جايين يقبضوا علي ... :D

:5flowerfa :5flowerfa :5flowerfa :5flowerfa :5flowerfa :5flowerfa :5flowerfa

بس أنا كان نفسى ان الموضوع لما يتحط ... يقوم بقية الأعضاء بابداء رأيهم وليس كلمات شكر ... فالرأى يحسن من أداء الفرد سواء الرأى كان سلبى أو إيجابى ....أهو هو ده الكلام ولا بلاش ... صح كده ...

بس المشكلة ان فيه ناس بتزعل من النقد و تفتكره تريقة ... فالناس التانية تخاف تنقدهم علشان الناس الأولانية ماتزعلش ... فالناس التانية هاتكتفي بالرد بـ"شكرا" علشان ماتضايقش الناس الأولانية ... يعني الموضوع فيه خبص كده ...

و كمان أهم حاجة هو النقد البنّاء ... مش بس هجوم كده عالفاضي ... و ده اللي احنا فعلا محتاجينه ...

آسف على الإطالة ... و شكرا لمشاركاتكم الايجابية ...

يلا بقى ... مش عايزين حد يقول "شكرا" تاني ... عايزين نقد للصبح ... :p

[™M@fia]

انت معاك حق بس فى ناس كتير اوى فى المنتدى مسجلين عضويتهم هنا فى المنتدى
فقط علشان يستفيدوا من خيره
وذى ماقلتم فعلا عدد المشاركات اقل بكتير من عدد الزيارات
يعنى لو لاحظتم موضوعى مشاركاته الان 422 بما يعادل 25 صفحه بينما عدد الزيارات 11 الف
وانا بعد ماكتبت الوضوع بيوم لقيت الفرق شاسع جدا بين عدد الزيارت وعدد المشاركات
ولكن اتعلم شيئا
كلمه الشكر التى يكتبها العضو بحريته قيمتها عندى تعادل مليون كلمه شكر من شخص مجبر انه يقلها
ودا الوضوع اللى انا كنت عملته بخصوص الموضوع دا
هنا (http://www.dvd4arab.com/forums/showthread.php?t=32299)

[حسام محمد]

وجهه نظر برضه يا جماعه
انا كل اللي كان هممني هو تقليل نسبه الاستغلال بالمنتدي
واعطاء كل ذي حق حقه
صحيح كان حقي انا هيقل بس كان هيبقي حقي
فانا من الناس اللي بتاخد من المنتدي اكتر ما بتدي
فكان نفسي في حاجه تحركني
بس انشاء الله بكره هبقي احسن منكم وهوريكم ايام
ماشي يا بنيأدمين
حسام بيدو قادم قريبا وبشده
بس كلام في سركم انا مش عارف لحد دلوقتي انتوا بتجبوا المواضيع الجامده دي منين
بس هعرف
وزنبكم علي جنبكم في رائيكم

[_DOUF_]

اعمل خير وارمية البحر

زي ما قيل من قبل هذا المنتدي لن يدفع لنا أموال للعمل بة او ان اول من يصل لعدد معين من المشاركات سوف يحصل على الجائزة الاولى " ملف تورنت "

لا اعتقد ان عدد المشاركات يفرق مع اي احد فعند وضعك لموضوع معين لن تنظر للعدد الذي رد عليك بل في بعض الاحيان اتمني غلق الموضوع حتي لا أحد مليون مشكور و احدهم يسأل سؤال ليس لة علاقة بالموضوع

عضو , عضو نشيط
كلها شكليات ليس لا أهمية
و ما علينا

[movieman]

عندك حق بس كلمه شكر برضه بتحسس الواحد انه عمل حاجه

[حسام محمد]

بس انا مصر علي اقتراحي مش للشكليات ولكن لوضع تفاوت ملحوظ بين المجهودات
افرض حد غريب داخل المنتدي
ولا يعلم الي من يلجئ سيفاجئ مثلا بيا انا (عضو نشيط) واخ تاني مثل جيني او فيمو ايضا (عضو نشيط)
تساوت الكفتان رغم التفاوت الكبير بيني وبين هذان الاخان
هما فين وانا فين
بس بيتساوي مشاركه الشكر بالمجهود
ولتالت مره هذا الاقتراح ليس في مصلحتي علي الاطلاق بل العكس

[NenomaN]

بسم الله الرحمن الرحيم

الاخ العزيز حسام محمد ..... الاخوة الاعزاء اعضاء المنتدي الكرام برجاء السماح لي بالكلام ....

طبعا انا شايف ان نتقطة الخلاف في هذا الموضوع هي اما جعل المرفقات محجوبة ولا يتم تنزيلها الا بالرد علي الموضوع

او تحديد نسبة من المشاركات والزيارات لتحتسب للعضو صاحب الموضوع او يبقي الحال كما هو علية .......

انا شايف ان كلام دة جميل جدا ولكن بعض الاعضاء يرحبوا بالفكرة الاولي والاخر بالثانية وهناك تناقض في الاراء

وهي فعلا مشكلة كبيرة ويعاني منها الاعضاء تعالوا اديكوا مثال والمثال هو انا شوفوا كدة تاريخ اشتراكي في المنتدي

واعتقد اني اقدم الاعضاء هنا في منتدي الالعاب كنت مشترك هنا علشان اخد منة الاشياء المحتاجة قبل دخولي منتدي الالعاب

كنت متواجد في منتدي الترجمة ومكنتش بشكر حد او قليل لما كنت بعمل كدة ولكن لما ركبت dsl لاقيت نفسي بدخل

في منتدي الالعاب وبدات بالاستفسار عن بعض الاشياء وبعدين لاقيت نفسي باكتب في مواضيع معرف عاجباكم ولا لأ

ولما صادفتني مشكلة التحميل بدون ابداء الرائي التمست العزر لبعض الاعضاء ممكن مايكونوش عندهم dsl ويكونوا

بدخلوا علي التليفون وانتم طبعا عارفين محدش حيديع وقت التليفون في الردود علي المشاركات فانا اتخذت اجراء ونفذتة

حطيط باسورد علي الملفات اللي برفعها والله اللي نزلها وعايز الباسورد بتاعها بيرسلي علي الرسايل الخاصة كدة احس

ان في حقيقي مشاركة ولومن الباطن اما بالنسبة للالقاب ارجو النظر الي اللقب الخاص بي وكمان شوفو انا مشترك من

امتي وعدد مشاركاتي كــــــــــــــــــــــــــــــــــــــــــــــــا م

واسف للاطالة

[GENNI]

أولا ... شكرا جدا يا نينو على مشاركتك في الموضوع ده ...

ثانيا ... أنا كنت من فترة طويلة عايز أسألك ... انت إزاي أخدت اللقب ده؟ :p

ثالثا ... أنا هاقول لك رأيي ... بس لو بتزعل من الصراحة أرجوك ماتكملش ...

طبعا هي وجهات نظر ... بس أكيد كلمة "شكرا" بتحسس الواحد بأنه عمل حاجة كويسة ... و بتفرح الواحد لأنه حس إنه قدر يفيد غيره ...

بالنسبة لموضوع كلمات الشكر ... أنا لي تعقيب صغير ...
زي ما انت قلت في الأول ... ان انت كنت بتدخل تاخد و خلاص ... و على فكرة ... مش انت بس ... أنا كمان أول ما دخلت المنتدى ده كنت بادخله عشان الترجمات ... و برضه كان عندي Dial-up ... فكنت باكسل أرد ... و أقول يعني هو ردي هو الي هايفرق ... عارف ليه؟ لأن احنا ماكناش حاسين بالتعب و الجهد المبذول في الحاجة ...

و برضه زي ما حصل معاك بالضبط ... الموضوع مابتداش معايا إلا لما ابتديت أضيف حاجة في المنتدى ... الموضوع ابتدا مع أول ترجمة لي (و الترجمة الوحيدة في الواقع :D) ... بعدها حسيت قد ايه الناس دول بيتعبوا ... و دلوقتي لما بانزل ترجمة ... باسيب الصفحة بتاعتها مفتوحة لغاية لما باتفرج عليها مع الفيلم ... و بعدين بادخل أشكر و أقول رأيي ... ماينفعش ماعملش كده ... لأني متخيل مقدار التعب اللي اتبذل فيها ...

المشكلة مش مشكلة DSL ... المشكلة مشكلة إحساس بمدى تعب اللي قدامك ... عشان كده تلاقي ان اللي بيشكروا هم الأعضاء الفعالين اللي بيقدموا حاجة للمنتدى ... لأنهم حاسين بالتعب اللي اتبذل في الحاجة ... حتى لو هم مش مستفيدين من الحاجة دي بس لازم يقولوا كلمة شكر للراجل اللي حاططها ...

أما بالنسبة للطريقة اللي انت متبعها ... طبعا أنا زي ما قلت ... الموضوع وجهات نظر ... بس أنا هاقول لك رأيي ...
هل انت بتحس بأي فرحة لما بتشوف الرسايل الشخصية الكتيرة؟ أنا ماعتقدش ... لأن انت عارف من جواك ان الناس دي مش بتشكرك و لكنها عايزة تشغل الباتشات و خلاص ... و غالبا هاتلاقي ان معظم الناس دي يا إما كاتبالك كلام إنشا يا إما مش كاتبه كلام خالص ...
لكن صدقني لو طرحت الموضوع من غير أي قيود ... حتى لو لقيت رد واحد بس لكل 100 زيارة هاتحس ان انت فرحان جدا لأن اللي رد ده ماكانش مفروض إنه يرد و لكنه رد عشان حاسس بيك ... فاهمني؟

آسف على الإطالة ... و أنا مش هاتكلم تاني ... لكني هاسمعك رأي الأعضاء (الأعضاء النشطين و الفعالين) في الموضوع ده زي ما قالوا بالترتيب ...

الشكر يجب ان ينبع من داخل الانسان وليس لمجرد المصلحه والموضوع ده لو فرضنا انه اتعمل هتلاقي مثلا واحد حطلك ابتسامه .علشان يحمل ما يريد واخر يضع كلمة شكر واحده . فتتمني ان لم يشكرك .لانك تعلم ان هذا الشكر ليس من قلبه.

فأى عضو مبتدأ هنا مسيره فى يوم هيبقى نشيط

طالما انت موضوعك جميل يبقى اكيد الناس هاترد عليك ... اسأل kokoeffect على موضوعه الرائع ( العاب المستقبل ) اللى عمل فيه مجهود كويس فى الاول لكن ماحدش رد عليه , و هو كان متضايق و مش عاوز يكمل , لكنى قلتله لو كملت و عملت مجهود اكبر فأن الاعضاء لازم يردوا عليك لانك تستحق , و فعلا ده اللى حصل و حاليا موضوعه من اجمل المواضيع .

انا لا أحب المجاملات ولكنى أحب الأراء ... ( حسن من كذا ... أو طور فى كذا .... ) وليس كلمات شكر ليس لها طعم ... ويكفينى أن هناك أكثر من ألف زائر سوف أرضى بمطالعتهم الموضوع وهذا هعتبره المقياس الأساسى لقوة موضوعى

كلمه الشكر التى يكتبها العضو بحريته قيمتها عندى تعادل مليون كلمه شكر من شخص مجبر انه يقلها

اعمل خير وارمية البحر ... لا اعتقد ان عدد المشاركات يفرق مع اي احد فعند وضعك لموضوع معين لن تنظر للعدد الذي رد عليك بل في بعض الاحيان اتمني غلق الموضوع حتي لا أحد مليون مشكور و احدهم يسأل سؤال ليس لة علاقة بالموضوع

[حسام محمد]

انا بجد مش عارف ازاي عمل bad sector دي جامده قوي

[NenomaN]

قدام اسلوبك الجميل اللي ماقدرش غير اني ارفع قبعتي واقول تنازلت عن الخصوصيات من الان فصاعد متاحة للجميع

وفي الاول والاخر انا تحت الامر المهم سيرتي تيجي بالطيب ويقال الاخ نينو عامل موضوع كويس ولو من واحد بس

واعتزر عن وضع الباسورد علي المرفقات واعتبروها اخر مره وتكفيني كلمة شكر من عضو واحد حتي ولو حملوا كل

المرفقات جميع اعضاء المنتدي الكرام وانا حفضل اكمل ان شاء الله طول ما فيا نفس

تحياتي يا شقيقي Genni تحية كبيره للاعضاء وللمنتدي

[GENNI]

كمل يا أخي العزيز نينو و هاتشوف إن انت هاتبقى اسعد بكتير ...

نسيت أقول لك ... أنا عندي برنامج اسمه HDD Regenerator ... البرنامج ده بيشيل الـ bad sectors لو عايزه ... ماتخافش ... بيحافظ على الـ data ...
هاهاهاهاهاهاهاهاهاهاهاهاهاهاهاهاهاهاهاهاهاهاها :D :p ...

[NenomaN]

لا يا عم انا عجباني كدة علشان مقعدش اخنق في نفسي واقول امتي حترقي انا كفاية عليا اشوف النجوم بتاعتي بتكتر

لغاية مااشوفها في عز الظهر هاهاهاهاهاهاهاههاااها

يا ريت تراجع الموضوع بتاعي انت وباقي الاعضاء وابدا الاراء في هذه الخطوة
http://www.dvd4arab.com/forums/showthread.php?p=326923#post326923
المشاركة رقم 30

[sewedy]

شكرا على هذا الموضوع الاكتر
و ياريت نشوف المزيد
من موضيعك الشيقه الجميله

[sewedy]

الاختيار الاول موجود فى بعض المواقع و هذا لحفظ حق الكاتب
و انا ارجح (1)

[mizogel]

أولا ... أحب أشكرك يا حسام على موضوعك الممتاز ... وأحب أشكرك كمان على اعتباري من "الأعضاء الجامدين" ... بس أنا مش جامد قوي يعني :p ...


ثانيا ... بالنسبة لرأيي فهو لا ...


ثالثا ... بالنسبة للأسباب ... فهي تشبه أسباب الرفض السابقة ...


بص يا حسام ... أولا بالنسبة للـ "لقب" ... المفروض ان انت يكون تقديرك الشخصي لنفسك و لمجهودك أهم من تقدير اي حد ... و صدقني هو ده اللي هايخليك تستمر ...


أنا معاك ان كلمات "شكرا" و "انت راجل كده :icon_thum" و "أنا مش عارف من غيرك كنت عملت ايه" كلها بتفرح الإنسان جدا و تديله دافع انه يستمر ...
و على الجانب الآخر ، فإن كلمات "ايه القرف ده" و "أهو ده الاستعباط بعينه" (زي ما اتقالت بالحرف الواحد كده لعضو كان مشارك بحاجة مكررة ... بلاش ... خلينا قاعدين ساكتين) أو حتى عدم الرد ، كلها بتخلي الواحد حزين و مكتئب و مش عايز يدي حاجة تاني ...


بس الكارثة هي انك تكون بتدي الحاجة و مستني قصادها كلمة "شكرا" كقيمة أو ثمن ...


إحنا مشكلتنا أكبر من كده بكتير ... أنا مش عايز أعقد المواضيع بس أنا عايز استغل الفرصة (أصل انا استغلالي و زي ما انت عارف الحياة فرص :evil4: ...


مشكلتنا كعرب ... ان احنا بنؤمن قوي بالـ "كلمة" ... علشان كده تلاقينا نقعد نتكلم كتير قوي لغاية لما مايبقاش عندنا وقت ننفذ أي حاجة من اللي احنا قولناها ... أوعى تكون فاكر اني باتكلم عليك أو على اي حد تاني ... أنا باتكلم عننا كلنا ...


أنت متخيل ايه اللي ممكن يحصل لو نفذنا اللي اقتراحك ...

الاقتراح الأول : انت كده بتشتري حب الناس ... هاتلاقي ناس كاتبالك "thx" علشان تختصر الوقت و ناس واخدة نسخة من كلام بعضيها و كاتباه تاني ... و ساعتها هاتندم ان انت طلبت كده ... لكن لما تلاقي ان الملف اللي انت رفعته فيه 50 واحد نزلوه و منهم واحد بس شكرك ، هاتحب الواحد ده جدا جدا لأن هو عمل حاجة مش مجبر عليها لكنه عملها بس علشان هو عايز يعملها ... و هو ده الحب ...


الاقتراح التاني : هاتلاقي الناس اللي بتكتب مواضيع (معلش في اللفظ) بتشحت ناس ترد عليها علشان تزود رتبتها في المنتدى ...


صدقني يا حسام ... العواطف دي أغلى شيء في الوجود ... بس عارف امتى؟ ... لما تكون من غير ثمن :cool: ...


أنا آسف ... طولت عليك ... بس ماحبتش أفوت الفرصة من غير ما أقول رأيي (أصل أنا مستغل زي ما قلت لك :D ) ...


يلا بقى ... هاتلاقي مواضيعي موجودة في التوقيع بتاعي ... خش اشكرني عليها :p
على فكرة أنا أقتنعت بكلامك أوي أوي و زي ما الأخ اللورد أحمد قال أول ما قرأت اللي هو كاتبه قلت دا نفس تفكيري و أول ما قرأت الكتابة اللي أنتا كاتبها دي يا Genni خشيت على طول على ملفك الشخصي أعرف أنتا عندك كام سنة و أتفاجأت لما لقيتك 21 سنة بس!!!(ما شاء الله)و على فكرة أنا لسا كنت بفكر في حكاية أني أعمل موضوع على الناس اللي بتاخد من غير و لا كلمة شكرا بس قلت يللا مش مهم المهم زي ما في ناس بتاخد من غير و لا كلمة شكر في ناس تانية برده "بتتدفع ثمن اللي بتاخده" :p و لو حتى بكلمة شكرا....عموما لما شفت الموضوع دا و قرأته كويس أنا في الأول كنت داخل أصوت للرأي التاني بعدين قلت لأ خليه الأول بس دلوقتي أنا بجد أقتنعت أن التصويت الصحيح لازم يكون للرأي الثالث و أصوت بلاااااااا :)

[GENNI]

شكرا يا أخي العزيز mizogel على كلامك الجميل ...

[emadalzouk]

والله انا شايف ان الواحد لما يعمل الحاجة لله افضل بكثير من اى كلمة شكر منتظرها من شخص اخر وافضل له ان يدعو له الاعضاء بخير من كلمة الشكر وانظرو الى موضوع الاخ servernet hkjl تعرفو قصدى ايه بجزاه الله خيرا والله فانا احب هذا الراجل فى الله لانه لا بنتظر كلمة شكر من احد وهذا الرابط لمن يريد ان يعرف لماذا وهو موضوع خاص بالبرامج ولحظو متى بداء الموضوع وكم البرامج التى وضعت فى المدة القصيرة دية ..

http://www.dvd4arab.com/forums/showthread.php?t=81524

[GENNI]

شكرا أخي العزيز emadalzouk على مشاركتك و كلامك الجميل ...
و أنا فعلا قد قمت بزيارة الموضوع و أعجبني جدا ... كما كان لي الشرف بالتعامل مع الأخ العزيز servernet في موقف بسيط ...

أبلغه تحياتي و سلامي ...
و شكرا لك على المشاركة مرة أخرى ...

[hamada20092010]

بصراحه انا مش عارف اقولك ايه وربنا شاهد انى معانى من الموضوع ده جدا
فى كذا موضوع انا رايى انه جامد ومفيد واخر رد فيه كان من اسبوع مثلا
عشان كده انا مع 1

[ahmed_88_05]

(1) لان فعلا الي يتعب يستحق نتيجة تعبه