الأخطاء الفظيعة فى الأعمال الدرامية المصرية

[daydamony]

تمتلئ أعمالنا الدرامية المصرية بالعديد من الأخطاء، بالذات عندما تتحدث عن أى شئ متخصص

مثل الطب، المحاماة، الهندسة، حتى تصليح السيارات والسمكرة
--------------------

مثال لذلك

حد منكم شاف المسلسل الأمريكى ER أو emegency room بمعنى حجرة الطوارئ بالمستشفى

بصراحة، أنا كطبيب كنت باستمتع بمشاهدته لأنى كنت بأحس إنى فعلا واقف معاهم فى الإستقبال

الكلام اللى بيقولوه، المصطلحات، الطريقة اللى بيتحركوا بيها، العلاج، التداخلات اللى بيعملوها

مستشفى بجد، ولا غلطة

وكل الأفلام والمسلسلات الأجنبية كده، ولا غلطة

أما فى مصر، فحدث ولا حرج

مثال آخر

تلاقى القاضى مثلا على المنصة بعلو صوته يقول

حكمت المحكمة حضوريا على المتهم فلان "بالسجن" سنة مع الشغل

وطبعا أى طالب حقوق عارف إن مافيش حاجة إسمه سجن سنة، لأن السجن أقل حاجة فيه 3 سنين، واللى أقل من 3 سنين إسمه حبس مش سجن.

مثال آخر

أخطاء اللهجات الفظيعة فى المسلسلات الفلاحى أو الصعيدى، واللى أى حد زار البلد دى، مش بس كان منها، حيعرف إن الناس دى بتقول أى كلام، لا يمت للهجة البلد دى بشئ، بس فالحين يحطوا على التيترات قام بمراجعة اللهجة فلان وعلان وترتان
----------------

اللى عايز يشارك معانا يقول رأيه، ويحط معاه مثال فعلى من أع عمل درامى، والخطأ اللى موجود فيه

وياريت يكون فى مجال تخصصه هو

يعنى لو طبيب يشير لخطأ طبى، لو محامى يشير لخطأ قانونى وهكذا

وياريت بلاش مشاركات من نوع مشكور، والموضوع جيد إلخ

اللى عايز يشارك معانا يقول رأيه، وياريت يجيب مثال

[ali_toyota]

الدراما عندنا اخي الكريم نظام مشي حالك حالك يمشي

بيفكرو ويركزو ازاي يكترو عدد الحلقات اكتر من التركيز في الموضوع او المادة المطروحه

وانا يحضرني مثل وان كان مش تخصصي انما اثار جدل كبير وهو موضوع

عذاب القبر في مسلسل العائله لما قالوا انه مفيش عذاب قبر

ولما ردوا عليهم علماء الدين تداركو الوضع وصححوه في الحلقه الاخيرة


ولو افتكرت حاجه تاني هتابعك

وشكرا علي الموضوع

[mfm91]

بس يا باشا احنا عندنا فعلا نظام فبركة مش مهم الجودة

انا مش هقلك مثال لان انا لسه طالب فمعتقدش ان فيه مثال في مجالي

لكن احنا فعلا عندنا كله فبركة

[the_x_genius]

أنا عندي مثال في فيلم ملاكي اسكندرية
لما أحمد عز بيختار كرافتة وغادة عادل تختارله واحدة تانية ، ما علينا
المهم في المشهد ده في خطأ في الإخراج وهو ان الكاميرا من ورا أحمد عز جايبة الياقة مرفوعة
ومن أمامه الياقة نازلة
وأرجو أي حد يأكد كلامي أو ينفيه علشان أتأكد اني مش أحول
والسلام عليكم

[daydamony]

خدوا عندكم المثال ده:

حتلاقوه فى أفلام كتيييير، ومسلسلات

قديمة وجديدة

ومثال طبى "من إختصاصى"

يخرج الطبيب من حجرة الولادة أو العمليات مطأطئ الرأس، ويقول آسفا:

للأسف إضطرينا نضحى بالجنين علشان ننقذ الأم

وده خطأ تكرر، لدرجة أنه أصبح حقيقة واقعة عند العامة، حتى المثقفين منهم

يذهب مع زوجته الحامل فى شهرها الأخير، على وشك الولادة، ويقول للطبيب:

المدام تعبانة قوى، وأنا مش عاوز أولاد، المهم الأم

وده خطأ كبيير للأسباب الآتية:

1- فى هذه الأشهر الأخيرة، لا يمكن التخلص من الجنين، وحتى فى حالة مرض الأم مرضا شديدا، فخطورة إنهاء الحمل أكثر، أو على الأقل تعادل خطورة إستكمال الحمل.

2- ببساطة، لايمكن للطبيب التخلص من الجنين، إلا إذا قتله

3- لوقتله وهو فى بطن أمه، مازالت المشكلة قائمة

4- وطبعا، مافيش معنى إنه يقتله بعد مايتولد
-----------

ولسه لغاية دلوقتى بيقولوا: ضحينا بالجنين علشان صحة الأم

-----------

شكرا

[khaled only]

[فلان وعلان وترتان


حلو تتران وعلى فكرة انا اشك ان هو الي مسؤول عن هاي الاعمال الفظيعة

[deadrabbit406]

فى خطأ فى أى عمل درامى و خصواصا المسلسلات

يبقى مثلا رئيس شركة أو مدير و قاعد قدام الكمبيوتر و المفروض انه بيعمل عليه اى شغل أو ع الاقل فى screen saver
لكن المأساة فعلا فى انك تجد مقدمة لعبة شغالة أو برنامج الرسام :S
دى حاجات بتغيظنى كما لو ان اللى بيتفرجوا مبيفهمش او ان مفيش غير 4 كمبيوتر فى مصر فمش مشكلة يحطو اى حاجة و لا حد فاهم حاجة فى حاجة

[daydamony]

مثال آخر:

مسلسل إسمه أحلام سارة

فى هذا المسلسل يمثل محمد رياض دور طبيب حديث التخرج، يبدأ عمله كطبيب مقيم فى قسم

"جراحة القلب والأوعية الدموية"

الخطأ هنا أنه لا وجود لمثل هذا القسم فى أى من جامعاتنا أو مستشفياتنا

لأنه لا يوجد فى تخصصات الطب مثل هذا التخصص

يوجد تخصص بإسم "أمراض القلب والأوعية الدموية"

وهى أحد التخصصات المتفرعة من تخصص الأمراض الباطنية "يعنى مش جراحة"

هناك تخصص آخر هو "جراحة القلب والصدر"

وهناك تخصص آخر وهو "جراحة الأوعية الدموية" وهو أحد أفرع الجراحة العامة
--------------

أعتقد أنهم كانوا يقصدون "جراحة القلب والصدر"، لأنهم كانوا يتحدثون عن جراحات للقلب

لكن طبعا معتمدين على إن "ماحدش بياخد باله"

[daydamony]

مش مشكلة التخصص، كل المسلسل ده أخطاء، خنقتنى بشكل

لكن الحاجة اللى ضحكتنى، يوم مناقشة رسالة الماجستير بتاعة محمد رياض

أولا: كان واقف يشرح الرسالة، رسالة طبية، وجراحة، واقف يشرحها من الورق

لا فى slide projector، ولا data show ولا حتى سبورة وطباشير

فكرتنى بطه حسين وهو بيناقش رسالته فى مسلسل الأيام
-------------

بعد ما خلص المناقشة، واقف يتلقى التهانى، ووراه إعلان بمناقشة الرسالة

لاحظت على الإعلان ده الآتى:

أولا: كله مكتوب بالعربى، مفيش ولا كلمة إنجليزى، مع إن عنوان الرسالة لازم يتكتب بالإنجليزى

ثانيا: مكتوب طبعا إعلان عن مناقشة رسالة الماجستير فى "جراحة القلب والأوعية الدموية"

إتفقنا إن تخصص "جراحة القلب والأوعية الدموية" مش موجود، يقصدوا طبعا "جراحة القلب والصدر"

لكن ما أخدوش بالهم إنه لا وجود شهادة بهذا الإسم فى مصر

يعنى مافيش حاجة إسمها "ماجستير جراحة القلب والصدر"

ليه، لأنه تخصص دقيق

اللى حيتخصص فيه، بياخد ماجستير جراحة عامة، وبعد كده ياخد دكتوراة فى "جراحة القلب والصدر".

ثالثا: عنوان الرسالة يفطس من الضحك

الجديد فى جراحات القلب

طبعا ده عنوان عام، وكبير وشامل

ينفع عنوان لمؤتمر، برنامج تليفزيونى

لكن رسالة ماجستير، صعبة قوى

فى البحث العلمى، دايما الباحث ياخد جزء صغير ودقيق، يشتغل عليه
---------

كل دى أخطاء فى المناقشة، وفى إعلان المناقشة

لكن، ما حدش بياخد باله

[daydamony]

حاجة بقى بتخنقنى بجد، وباشوفها دايما فى الأفلام القديمة

وهى "قيادة السيارة"

تلاقى عماد حمدى قاعد ورا الدريكسيون وعمال يحرت

يلف فيه يمين وشمال، لفات جامدة جدا

كأنه فى سباق crazy car

هو طبعا ما بيسوقش ولا حاجة

لدرجة إنى كنت فاكر، وأنا صغير، إن لف الدريكسيون كده هو اللى بيمشى العربية

ولما كنت أركب عربية، أستغرب، العربية دى ماشية إزاى،

واللى بيسوقها ما بيحركش الدريكسيون خالص؟؟

[ramyso4]

tab ha2olokom 3ala 7aga mawetetny men el de7k fy film wa7ed men el nas waho mafrood esmo film entag 2006 we action ya3ny mafrood yeb2a metzabat

lama kan karim 3abd el 3aziz fel segn we beye2ra el garayed el gabhalo aboh 3an el 3ayez yente2em meno da we takhod balak ba2a en el manshetat metlaza2a by wara2 abyad 3ala el gornan kan manzar 3era awi besara7a we yeda7ak

[ramyso4]

la2a wala aflam el malek yousef mansour el action beta3et el 90nat dy lama kano bey7ebo yebayeno en el batal sari3 fy we yedoso forward

[ali_toyota]

حاجة بقى بتخنقنى بجد، وباشوفها دايما فى الأفلام القديمة

وهى "قيادة السيارة"



فكرتني يا ديداموني بحكايه قيادة السياره دي

تلاقي البطل في الافلام القديمة ممعهوش حتي يدفع الايجار ومعاه عربيه منين متعرفش

لأ والعجيب تلاقي البطل دايما في الافلام دي بيعرف يسوق حتي ولو كان معدوم الفقر ممعهوش اللضا

طب اليومين دول فيه مراكز تعليم السيارات وممكن اي حد يتعلم قيادة السيارة

زمان بقي كانو بيعملو ايه اللي اعرفه زمان اللي كان بيسوق اللي معاه عربيه بس

حاجه غريبه

لا اله الا الله

علي رأي صلاح عبد الله في سمبل

[samir_mantis]

بخصوص العربيات تلاقي اي حد بيركب العربيه
بيركبها بطريقه محترفه شوية انا مش عارف اوصفها
وفي الطبيعة تلاقي الناس اللي علي اد حالها
بتركب العربيه تلاقيها بتدخل
راسها الاول وبعدين رجلها

يعني هو مفيش محاكاة للطبيعة خالص

[daydamony]

شكرا على مروركم، وردودكم الحميلة

[عمرو2005]

الغلطتين اللى انا لاحظتهم هما كلاتى

اول غلطة كان فى مسلسل رافت الهجان الجزء الاول لما راح اسكندرية و هو رايح للخواجه سمحون كان راكب عربيه قديمة و كل العربيات اللى حواليه فى الشارع كلها موديل الثمانينات
المشهد التانى كان ماشى هو و تيسير فهمى و رايحين للخواجه سمحون الميكرفون كان واضح اوى و هو ممدود من تحت عشان يسجل كلامهم

الغلطة التانية كان فى مسلسل محمود المصرى بس بصراحة مش متزكر الحلقة اوى المهم محمود المصرى كان فى اليونان كان فى مشهد خالد صالح كان فى مكتبه و كان معاه واحد من العساكر و سبحان الله يا مسلم العسكرى كان لابس زى مكتوب عليه شرطة نيويورك ايه جاب اليونان لنيويورك الله اعلم

و شكرا على الموضوع يا باشا

[master engineer]

ويا سلام بقي علي ظباط البوليس اول مالجريمه تحصل تلاقيه في المكان فورا منغير بلاغ ولو القاتل هرب يمسكوه في الشارع ولا المهندسين تلاقيه في اي فيلم او مسلسل بيرسم وكان كليه الهندسه عماره وبس

[master engineer]

ولا حرب اطاليا لما ام صاحب احمد السقا عملت ميته وخالد صالح شاف النبض وعمل عبيط

[voo]

يا جماعة انتوا ناسيين اهم عمل كان فيه اخطاء..."العميل 1001" او زى مانا بحب اسميه مسلسل "عمرو وحشنى قوى"
عشان طبعا الجملة دى كانت عملة زى التتر بالظبط موجودة فى كل حلقة..... عندكوا بقى غلطة علم مصر المقلوب الشهيرة.... و مشهد سناء يونس و هى ميتة و بتتنفس عادى اكن ده الطبيعى... اما بقى عن الركورات فحدث ولا حرج... بالذات مشاهد رياض الخولى فى المخابرات... تلاقى مثلا مشهدين فى حلقتين مختلفين و بينهم فترة زمنية .. لكن البدلة هى هى والمكتب هوهو...
برضه من الاخطاء الشهيرة فى اى عمل مصرى و دى حاجة فى مجال تخصصى هى لما يخلوا ممثل يعزف موسيقى مثلا.. او يغنى مع فرقة موسيقية....طبعا مش هقولكو ان اصلا مفيش عزف و الفرقة بتكون بتحرك ايدها اى كلام مش ماشية مع الموسيقى ... وكمان ساعات تلاقى فى واحد بتاع اكورديون بيعزف والموسيقى المسموعة مافيهاش اكورديون اصلا .....كمان كتير فى الافلام تلاقى الممثل اول ما يدى الفرقة النوتة الموسيقية يعزفوا اللحن فورا من غير اى غلطة زى فيلم عبد الحليم و صباح بتاع المايسترو عزيز.... وده طبعا اى كلام فى اى حاجة...فى حبن ما ننساش كلنا فيلم desperado لانطونيو بانديراس لما عزف على الجيتار... اهو ده كان عزف بجد فعلا...ارجو انى اكون اوضحت الفكرة...وسلامو عليكو

[delnaby]

وليه يا جماعه في فيلم امير الظلام لما كانوا ماشيين في الشارع وهم بلابيص ولا لما كانوا في النافوره بيستحموا

ولما كانوا في المترو ودخلوا عربه السيدات

ولا كان فيه حكومه في البلد ومش عارف ازاي وصلوا

[daydamony]

و مشهد سناء يونس و هى ميتة و بتتنفس عادى اكن ده الطبيعى...

شفتها أتكر من 100 مرة فى أعمال مختلفة
--------------

اما بقى عن الركورات فحدث ولا حرج... بالذات مشاهد رياض الخولى فى المخابرات... تلاقى مثلا مشهدين فى حلقتين مختلفين و بينهم فترة زمنية .. لكن البدلة هى هى والمكتب هوهو...
برضه من الاخطاء الشهيرة فى اى عمل مصرى

كان فى برنامج إسمه راكور

كان إتذاع منه كام حلقة على قناة النيل للمنوعات

لكن وقفوه، ربك حليم ستار، وبلاش فضايح
---------------

برضه من الاخطاء الشهيرة فى اى عمل مصرى و دى حاجة فى مجال تخصصى هى لما يخلوا ممثل يعزف موسيقى مثلا.. او يغنى مع فرقة موسيقية....طبعا مش هقولكو ان اصلا مفيش عزف و الفرقة بتكون بتحرك ايدها اى كلام مش ماشية مع الموسيقى ... وكمان ساعات تلاقى فى واحد بتاع اكورديون بيعزف والموسيقى المسموعة مافيهاش اكورديون اصلا .....كمان كتير فى الافلام تلاقى الممثل اول ما يدى الفرقة النوتة الموسيقية يعزفوا اللحن فورا من غير اى غلطة زى فيلم عبد الحليم و صباح بتاع المايسترو عزيز.... وده طبعا اى كلام فى اى حاجة...

وتلاقى فريد أو عبد الحليم ماسك العود وهات يا غنا

والموسيقى طالعة من فرقة كاملة، بإيقاعات كمان
-------------

شــــــــــــــــكرا

[ArAbIAN YuRi]

هههههههههههههههههههه

موضوع جامد

الاخطاء الي انا فاكرها

هي اخطاء

مرة كان في مسلسل مش فاكر اسمه حد اتقتل ومفروض في اتنين بيتكلمو قدامه راح هو مبربش بعينو

وفي فيلم عمارة يعقوبيان

في خطئ فني وهو عدم ربط الاحداث ببعضها مثلا عادل امام مقبلش ابنه ولا مرة في الفيلم وهكذا

وفي خطئ في ملاكي alex لما هو شاف المخبرين الي كانو بيجرو ورا غادة عادل والمفروض ان العربية قدام الناس دي
وهو اصلا راكب فلعربية يعني يدوبك يشوف غادة عادل بلعفية وهو بيتذكر فلاخر افتكر ان المخبرين دول اصلا مش مخبرين
طيب شافهم ازاي؟


لما افتكر تاني هقول

[daydamony]

شــــــــــــــــــــكرا

على المرور، والردود الجميلة

[dvd_kande]

لا هقولك على خطأ فادح وكأن المتفرجين حمير وليس لهم دراية بعالم الكمبيوتر
المهم فى مسلسل السيالة بطولة احمد الفيشاوى
حسن حسنى بيبعت ايميل للمحامى والمخرج فكرنا حمير قام المحامى وفتح ملف ورد مكتوب فيه الرسالة

ويعنى كدها الايميل وصل ..... متعة مشاهدة الافلام الاجنبية هى القدرة على اقناعك بفكرة الفيلم والرد المباشر
من سياق الفيلم على التساولات الموجودة اخل عقلك...........شكرا

[daydamony]

فى كمان خطأ بيتكرر فى كل المسلسلات الدينية اللى بتتكلم عن السيرة النبوية وبعثة الرسول "ص".

طبعا من المعروف تاريخيا إن أهل مكة، وبالذات قريش، كانو تجار، وزى ما القرآن بيقول:

"لإيلاف قريش، إيلافهم رحلة الشتاء والصيف"

يعنى ناس بتسافر، وتبيع وتشترى، إستيراد وتصدير، يعنى بضاعة داخلة وبضاعة خارجة

يعنى من الآخر، ناس مش فاضية تهرش، زى بورسعيد كده سنة 1980.

لكن المخرجين بتوع المسلسلات تبعنا، يجيبلك أهل قريش دول كأنهم عالم مقاطيع

عايشين كلهم فى خيم، وعالم فاضية ما وراهاش أى حاجة

كل شغلتهم إنهم يقعدوا فى الشمس، وأول ما حد يقول لهم: "يا معشر قريش"

يطلعوا كلهم عن بكرة أبيهم، ويتلموا حواليه، كأنهم بيتفرجوا على حاوى
--------------

كل سنة وإنتم طيبين

[hamees_333]

في مسلسل مش فاكرة اسمه

كانت دلال عبد العزيز بتعمل شات مع محمود قابيل المفروض على المسنجر

كانت فاتحة ملف وورد وبتكتب فيه

[Bryan_91]

والله موضوع أكتر من رائع يبين الأخطاء الكبيرة ده

أنا كمان لاحظت حاجة غريبة في مسلسل العميل 1001 في الحتة لما كلهم راحوا المسرح لما كان عمرو هيتكشف ووليد قام وقعد يتكلم لاحظت إن المسرحية كانت لسة شغالة

والمفروض إنها تقف وده خطأ لأن لو حد إتكلم في مسرحية غير الممثلين المسرحية هتقف .... يريت حد تاني يكون خد باله من الحته ده ... وشكراً جداً على الموضوع ده

[kaizer]

وكان فيه فلم فيه سميه الخشاب ونور وكده

المهم كان المفروض البطل انه بيكلم البطله على النت بى الويب كام

تخيلو المخرج فاتح برنامج ميديا بلاسر وفيه صوره البطله

وال ايه هيا دى المحدثه الى موجوده ما بنهم


بجد احنا ادمنا 1750 سنه عشان نعمل فلم وحد مقنع

شوف اقل مسلسل اجنبى بيبقى مخدوم ازااى

عشان بيجيبو ناس كل شغلتها انها تشوف ايه الصح الى المفروض يتلع ادام الكدر ويتعمل

مش زى عندنا كلاكيت رابع مره وكت وسجل يا محسن والى بعده


ورغم كده بيعملو مليون مسلسل ومليون فلم

ناس عارفه هيا بتعمل ايه مش بيقلدو وخلاص


ولا مدينه الانتاج الاعلامى الى طلعين بيها السما دى بجد دى قمه فى التخلف

مفيش واقعيه الحاره ولا المصنع ولا اى حاجه

تلاقى الناس ماشيه فى الشارع ووبعد دقيقه هيا هيا الناس بتلف وترجع تانى

ولو لحظتهم فى نفس تامشهد تانى يوم برده بيلفو ورا بعض وتلاقى واحد راح باصص للكميرا وعادى المخرج ولا فى دماغه

مصر بخير وحتفضل طول عمرها بخير

[mucha_lucha]

وبعد كده يقولك المخرج العبقرى فلان و السيناريست علان بلا نيله

[abdo_barody]

وفى فلم تايه فى أمريكا الميكرفون بان فى مشهد من المشاهد

[fo2sh]

وتلاقى فى الافلام العربى القديمه ولحد دلوقتى المشهد فى البيت المفروض انه بالليل والبطل يخرج من البيت تلاقى الدنيا فى عز الضهر والمفروض ان الوقت الزمنى بالليل
حاجه تجيب الضغط

والمهندس لازم يطلع زى ماقلتوا مهندس مبانى عماره او مدنى بس كان هندسه مفيهاش غير التخصص ده وتلاقيه حاطط البورده وماسك المثلث الخشب اللى من ايام الهكسوس والمسطره التى اللى من عصر بناة الاهرام حتى لو كان المسلسل ده بيحكى عن فتره التسعينيات مثلا لازم يطلع المثلث الخشب ده اللى عمرى ماشفته فحياتى كلها واسمى خريج هندسه طب ده مقبول فى ايام افلام عبد الحليم حافظ مكانشى فى مثلثاتغيره وقتها لكن دلوقتى ايه الحجه

والمشهد اللى يفقع المراره ان لازم البطل لما يجراله حاجه ويبقى محتاج نقل دم تلاقى على طول اللى بيتبرعله واحد مكانشى طايقه طول الفيلم او المسلسل لدرجة ان المشهد ده اجبارى فى كل الافلام والمسلسلات وطبعا ده بيدل على ان قلوبنا بيضا زى شق اللفت

والمتأمل فى الافلام والمسلسلات يطلع اخطاء بالجمله

[hopico]

هههههههههههه الاخطـــاسء مفيش اكتر منهــا وكل الى انا فاكرة ان فى فيلم الناصر صلاح الدين كانوا بيتكلموا
باللغتين الفصحى والعمياه فى فيلم واحد زى لقطه مريم فخر الدين لما قالت اريد وائعا مليان