يا ريت آخــــد رأيكم في هذا الموضوع

[زيـــ NeT ـــزو]

السلام عليكم

انا عضو جديد ويا ريت أكون أخ جديد بالنسبة ليكم جميعا.....

أنا اسمي أحمد خريج كلية الحقوق ( جامعة أسيوط ) ودلوقتي وكيل نيابة عقبال كل اللى في حقوق يا رب ، وكنت حابب

آخد رأيكم في موضوع شاغلني شوية وهوا موضوع أخويا الصغير وهوا دلوقتي رايح الفرقة الثانية في كلية الحقوق وهوا

أخد أول سنة في جامعة أسيوط نظرا لقرب المسافة لأننا من محافظة سوهاج وأخويا دلوقتي عاوز أو بيفكر انه يحول حقوق

القاهرة بسبب تحويل الأغلبية من اصحابه لحقوق القاهرة لادعائهم بأنها هى الأفضل (والأسهل في الحصول على تقادير)

من كلية الحقوق بجامعة أسيوط.

فأنا حابب آخد رأي الجماعة اللى في حقوق القاهرة أو اللى اتخرجوا منها أو أي حد عنده فكرة عن حقوق القاهرة .

ومستني الرد من اخوانى الأعضـــــــاء

والسلام عليكم......

[roz115]

أخي العزيز

أولا أهلا بيك في منتدي الديفيدي العربي .

ثانيا كيف تكون كليه حقوق أسهل من كليه حقوق نفس المواد في الأثنين ونفس طريقة التدريس قد تزيد مادة أو تقل مادة ولكن في النهاية المواضوع واحد .

وأعتقد أن جامعة القاهرة الأن ليست سهلة كما كانت من قبل وعموما بصفتك خريج جامعة أسيوط تعتقد أنها سهلة ؟؟

انا خريج جامعة عين شمس ودفعة 2000 ومن قبل أن أتخرج وقد كنا نقول أن جامعة القاهرة أسهل بكثير ولكن عندما تجلس مع صديق لك من جامعة القاهرة تقتنع أن الموضوع مختلف عما كنا نسمع عنه .

عموما إذا كان يعتقد أن جامعة القاهرة أفضل له فدعه يأتي إليها لأنها رغبته للتفوق إذا أراد لكن أعزرني (ليست القاهرة ولا عين شمس جامعات تحصل منها على تقدير إلا إذا كنت من أبناء الدكاتره) .

[الشيطان يعظ]

اخى العزيز
كليات حقوق المحافظات او الأقاليم بمعنى اصح
بتكون اسهل فى الامتحانات والتقديرات
ودى حاجه معروفه
بس اللى اعرفه ان فى الوظايف او فى الحياه العمليه بيفضلوا
خريجى القاهره وعين شمس عن باقى الجامعات الأخرى
وانا خريج حقوق عين شمس 2007
والدراسه فيها كانت صعبه جدااااااااااا
وكمان دلوقتى اتعين وكيل جديد للكليه وهو الدكتور ابراهيم عيد نايل
وبصراحه مصعب الدنيا اوى
اما فى القاهره انا بعمل دبلومه هناك فى القانون الخاص الدراسه عاديه
واكيد الدبلومه تختلف عن الدراسه العاديه
بس اللى اعرفه ان اكيد جامعة اسيوط اسهل
بس خلى اخوك يعمل صلاة استخاره عشان ميرجعش يندم

[Mr.Albert]

ياريت حضرتك ماتزعلش من كلامي أو تعتبره إهانة ليك شخصيا لكن حضرتك اتعينت في النيابة إزاي ؟؟؟ بمعنى هل إنت ليك واسطة هي اللي عينتك و لا بالتقدير بتاعك بس ؟؟؟ ياريت الإجابة تكون بصراحة شديدة و ماتكونش زي كلام التليفزيون
فلو عندك واسطة تبقى أكيد هي نفسها اللي هتعين أخوك في النيابة و في الحالة دي ماتفرقش أخوك هيكون خريج جامعة إيه سواء القاهرة أو أسيوط ده رأيي المتواضع و أرجو أن تقبله و لا تفهم الكلام على إنه أهانة ليك أو أي حاجة .
أخوك البرت المحامي

[زيـــ NeT ـــزو]

بشكركم على اهتمامكم بالموضوع وده طبعا أولا.....

وأحب أبدا بالرد على أخويا اللى بيقول ان جامعة أسيوط أسهل وده طبعا أقدر أرد عليه وعليكم فيه لانى متخرج منها

واقولكم ان ( جامعة أسيوط ) من أصعب الجامعات في مصر كلها وبجميع كلياتها وأيضا جامعة عين شمس مشهورة اوى

بصعوبتها لكن على ما أسمع من معظم الناس أن جامعة القاهرة أسهل بكتير من عين شمس واسيوط .

وعلى فكرة جامعة أسيوط أو بالمعنى الأصح حقوق أسيوط ليها نسبة أكبر من اي جامعة تانية في قبول وكلاء النيابة

والاحصائية معروفة 40% نيابة من حقوق أسيوط كل سنة !!!!!! وباقى النسبة بتتوزع على باقى جامعات مصر !!!

اقدر بئا امد سطــــــــــر علشان اعرف ارد على أخويا ( البرت المحامى )

=================================================

وأحب اقوله سؤالك أي شخص بيسألهوني عادي وبردعليه بمنتهى السهولة(( وهوا في ايه دلوقتي في بلدنا من غير واسطه))

دلوقتي يا صاحبي الناس بتشترى العيش بالواسطه علشان ميقفوش في الطابور !!!

اولا لو حد غيري كان رد عليك وقاللك لا انا دخلت من مجهودي لأنى تقديري العام ( جيد جدا) فمظنش ان نيابة تشترط انها تقبل الوكلاء بتوعها بتقدير عام امتياز ، فأنا أحب أعرفك واصارحك طبعا انى لو جايب تقدير عام امتياز ومن غير كوسة مكنتش فكرت اساسا انى اقدم نيابة................!! ده طبعا في بلدنا

لكن انا الحمد لله ذاكرت وجبت تقدير عام جيد جدا وتوكلت على الله وقدمت نيابة وعلشان ربنا كاتبلى كده الحمد لله اتقبلت

وأكيد طبعا كانت معايا واسطة بس زي مصارحتكم وقولتلكم انى معايا واسطه أحب اصارحكم واقولكم انى مدفعتش مليم واحد للواسطه دي (( علشان محبتش انى أبدأ حياتي برشوة )) وده اللى خلانى برده مقدمتش شرطة قبل دخولى الكلية واساسا الواسطه ديه كان قايللي بنفسه(( حرام عليك تكون جايب جيدجدا وتحرياتك مظبوطه وتدفع مليم واحد )).

فالحمد لله قدمت واتقبلت أما بئا موضوع ان الواسطة ديه تدخل أخويا والكلام ده فاحنا منحبش نحط أملنا كله على الواسطة

احان نحط أملنا على ربنا أولا وعلى مجهودنا ثانيا

يعني انا معاك الواسطة موجوده طيب افرض مثلا ان أخويا جاب تقدير العام مقبول ديه بئا تعمله ايه دي حتى متخلهوش يعرف يطلع كارنية النقابة

أخويا دلوقتي ظهرت نتيجتة والحمد لله نجح وجاب تقدير (جيد) ولسة شكله مصمم انه يروح جامعة القاهرة مع أصحابة

وربنا يعلم اللى في الغيب

وشكرا على ردودكم ومشاركاتكم معايا ......


تحياتــــــــــــــى.....